Kilometro 35

Gula 52

Nakahukom ko nga sa kaugalingong balay nila ni Lyle ko siya tumbaha. Mga katabang ray mahibilin kun maadlaw sa balay nila ni Lyle. Ang iyang mga ginikanan busy sa pag-atiman sa nagkadako nilang negosyo sa pawnshop. Suheto ko niini kay may silingan man mi kaniadto nga nahimong sulugoon sa pamilyang Cubillo.

Nagdali mi si Fernan pagpaingon sa barangay Calubian. Paspas ang pagpadagan ni Fernan sa among gisakyan. Apan mao pa gani among pagsulod sa barangay Calubian, nanawag si Bredhart kang Fernan. Si Bredhart mipahibalo nga si Lyle bag-ohay lang nakabiya sa gipuy-an niini kuyog ang iyang mga barkada nga gipangulohan ni Sheldon Abrigos.

Midugang pagpahibalo si Bredhart nga gisundan nila ang sakyanan nila ni Sheldon Abrigos. Apan si Fernan mimando nga lung-an lang una pagsunod sila si Sheldon ug ang iyang mga barkada.

“Pamauli na lang mo,” nagkanayon si Fernan sa pagsultihanay nila ni Bredhart sa cellphone. “Ipadayon ta na lang ang pagsunod-sunod kang Lyle sa sunod adlaw.”

Nianang pagkagabii, wala dayon ko makatulog sulod sa akong lawak. Mingaw na ang kalibotan ug lawom nang gabii apan wala pa ko dukaa. Maoy akong gihunahuna si Lyle. Ingon sa gidebuynas ang tonto kay sulod sa duha ka adlaw na namong pagsunod-sunod kaniya, wala man gyud siya namo mataymingi. Gisuwerte pa gyud ang kanahan. Pero wala ko kawad-ig paglaom nga mahulog pa gihapon siya sa akong mga kamot sa tukmang panahon.

Mibangon ko kay dili man gyud ko makatulog. Mipaingon ko sa may bentana. Giablihan ko kini ug nanambo ko sa gawas. Misugat nako ang kabugnaw sa huros sa hangin. Unya mitingkag ang akong mga dalunggan gumikan sa akong nakita didto sa tugkaran sa balay. Bayhon sa usa ka tawo. Si Bredhart! -- Sumpayan pa