Anananggal nga namalbal

Siyaro na sad ka Igong ... dili na lang gayod ikaw makapuasa bisan usa na lang ka adlaw nga mamalbal?" lanog kaayo ang sininggaak sa tingog ni Imak bisan pa man sa katugnaw sa kagabhion.

"Pasko god ron ug angay kitang duha mo-relax aron saulogon ang sumad sa pagkatawo sa atong Ginoo!"

Imbes ako mopatuo sa gipahinumdom kanako sa akong asawa gibati ko na hinuon ang dili tiaw nga kaluhag nga mosuyop og lab-as kaayo nga dugo. Nakabalita man god ako nga dul-an sa napulo ka tawo sa may bukiran sa Kabatbatan nga sakop ning among lungsod sa San Fernando, ang gimasaker ug patay sa mga rebelde nga sakop ni Kumander Boy Pinong Abaquita?

"Ngano god intawon Imak nga angay pa kitang duha nga magsaulog sa kasumaran sa pagkatawo sa giingon mong Ginoo ... nga ang atong duha ka kalag pulos na man nasudlan og demonyo sa atong pagka-mangtas nga ungo ning balangay sa Pitalo?" sagol tuno sa kasapot ang gitubag ko sa akong asawa nga niadtong tungora imbes dugo sa tawo ang gilak-ang sa may dabahan ... nagtughong hinuon og binlod nga among nasibo sa among silingan.

"Na ikaw god Igong. Basta ako anhi na lang sa atong payag aron paaboton ko ang hinagtok sa orasan sa pag-abot sa alas dose diin sumad nga gihimugso ang atong Manunubos!" dihay kasigo sa kahugot sa katarongan sa akong asawa nga dili ko gayod mapiog aron makig-uban kanako nga mamalbal.

Hilabihan tuod kaalingisig ang kinatibuk-an sa palibot kutob sa akong maagian. Lanog kaayo ang buto-buto sa rebentador nga kanunay nasawod sa akong dunggan. Pun-an pa sa paskohanong awit nga sa akong paminaw ingon sa nagyagaw ilabi na sa mga manaygonay.

"Prakkkkkkkkk!" dihay kasipa sa akong pagtugpa isip usa ka anananggal sa may dapit sa bukiran sa Kabatbatan.

Giliraw ko ang duha ko ka mata kun hain kaha ang mga patay'ng lawas sa gibalita nga adunay gimasaker sa mga walhon nga rebelde?

Nalukop-lukop ko na lang og libot ang kasuokan nga lugot sa may bukiran sa Kabatbatan ...ug naunsa na man hinuon nga hitaboa nga didto na man hinuon ako mahisum-ok sa may kampo sa grupo sa mga rebelde nga gipangulohan ni Kumander Boy Pinong Abaquita?

"Bosss .... Kumander gikaluy-an gihapon kita ning paskoha kay aduna kitay maasal nga langgam nga may nagbitay   nga tinai sa lawas?" hapit magkadungan ang tingog sa mga sakop ni Kumander Boy Pinong Abaquita nga wa makamatikod kanako nga usa ba diay ako ka anananggal niadtong higayona.

"Ayawwww ... intawon ... akoooo ... ninyoooo ... patyaaaa!" dihay kainggit sa akong tingog nga nagpakiluoy sa mga rebelde nga wa gayod ibuwag og tion kanako ang gato sa ilang M-16 rifle ug Armalite.

"Boss Kumander ... langsi man kaayo og baho kining langgama ug basin mosuka ka nga makapanimaho?" dihay usa sa mga sakop ni Kumander Boy Pinong Abaquita nga nanabon og panyo sa iyang ilong.

Maayo gani nga nakahunat og sikad ang akong pako diin muna sa ginhawa nakong kapaykapay lagbas sa kangitngit sa kabukiran sa Kabatbatan.

"Unsa na Igong naka-bring house ba ikaw sa imong pagpamalbal?" dihay tuno sa kaluhag sa pangutana kanako ni Imak.

"Gigabaan tingali ako sa atong Ginoo ... Imak kay diriyot ako matipi og patay sa mga sakop ni Kumander Boy Pinong Abaquita sa may bukiran sa Kabatbatan!" luhaan ang duha ko ka mata.

"Hala kaon na Igong aron sukaran ko ikaw ning nag-aso-aso pa sa kainit sa tinughong nga binlod," hupong sa kaparaygon si Imak nga migakos kanako.

Inanay among nabatian ang kahawot sa tingog sa mga manaygonay nga nagtimaan nga sa dili madugay moabot na ang Pasko. (Kataposan)