Maayo! Maayong gabii!!" Tingog sa usa ka hingkod nga babaye ang nangayog katahoran niining bisperas sa Pasko samtang nagtoktok sa pultahan sa among pinuy-anan.
"Susiha ra palihog, Artemio, kung kinsa kana'ng nanampit," mando pa ni Papa Emon kanako.
Tuod man giablihan ko ang pultahan aron sa pagsuta kung kinsa ang nahiabot.
"Uy Tiya Sima, kamo man diay kana! Dayon kamo kay ako unang pahibaw-on sila si Mama Nita ug Papa Emon sa inyong pag-abot," nako pa ngadto nila ni Tiya Sima.
"Salamat, Dodong Artemio, kay ako una kining ipapalong ang sulo nga lukay ni Tiyo nimo Simo," matud pa usab ni Tiya Sima kanako.
Dugay nang panahon nga nagbungol silang Papa Emon ug ang iyang mga igsoong si Tiya Sima ug Tiyo Simo gumikan sa panagbikil mahitungod sa ilahang mga kabtangan.
Buot untang angkonon ni Tiya Sima ang mga tinanom nga saging ug lubi ni Mama Nita pinaagi sa pag-ani niini nga wala magpahibalo kanila ni mama ug papa, kay matud pa ni Tiya anaa kini mahimutang sa utlanan sa ilang yuta busa iyaha kini.Samtang ang bag-ohay lamang nga namuso nga kamaisan nilang mama ug papa hapit usab mahurot og kaon sa mga dangan ug binuhian nilang hayopan ni Tiyo Simo.
Sa tumang kahiubos ni Papa ngadto sa iyang mga igsoon mikuha siya sa iyang garote aron pagsong og pinuspusay ngadto kanila, pulos man god ni sila disipolo ni Cacoy sa Doce Pares. Ug maayo nalang gani nga napugngan pa sila sa among barangay kapitan, nga dili ra usab layo ang pinuy-anan.
Apan sa pagpanglabay sa mga adlaw miinanay pagbalik ang maayo nilang pagtinagdanay ug nahanaw ang kaligotgot sa matag usa kanila labi pa sa dihang nihatag og usa ka sakong bugas si Tiyo Simo ug usa usab ka alaslong baboy kang Tiya Sima sa kasal sa akong maguwang nga si Diego.
"Maayong gabii ninyo diha Manoy Emon, Manang Nita," pangatahoran pa sa akong uyoan ug iyaan.
"Maayong gabii usab kaninyo," tubag usab nilang Mama ug Papa.
"Maayo kay nahasuroy kamo," sukna pa ni Papa ngadto kanila.
"Laraw gayud namo manoy, ang pagduaw kaninyo karon," pong pa ni Tiyo Simo.
"Salamat kung mao kana," matud pa usab ni Papa. "Aron usab makapangayo kami og pasaylo sa among nabuhat nganha kaninyo Manoy Emon, Manang Nita," pong pa ni Tiya Sima.
"Dugay na kamong gipasaylo namo ni Manang ninyo Nita, nanglabay na kadtong tanan ug ilubong na nato kadto sa kalimot," kalmadong pong ni Papa ngadto sa iyang mga manghod.
"Salamat kaayo Manoy Emon, Manang Nita walay sama ang inyong kabuotan," matud pa sa akong uyoan ug iyaan, ug unya midagayday ang ilang mga luha.
Unya kalit lang may nagsipa-sipa nga buto sa kawanangan, mga kwitis diay kadto ug wisolbam unya gipalanog pa gayod sa mga lantaka. Mao diay kay untop alas dose na sa tungang gabii ug adlaw na karon sa Pasko. Amo dayong giladlad sa lamesa ang budbod, biko ug bibingka, siyempre, dili gyud mawala ang espesyal nga torta. (Kataposan)