Ang gugma sa kano

Mao ra kini imong dala?misingka si Primo kang Virgie nga nagdala og pipila ka mga utanon. "Hala-balik didto ug pagdelihensiya og akong makaon."

Walay tingog si Virgie nga misunod kang Primo balik sa merkado.

"Uy Virgie! Naunsa na god intawon kanang imong hitsura, hugaw ka na kaayo ug nagkagidlay pa," timbaya sa iyang suod nga higala nga si Mira. "Asa ka man paingon?"

"Gipadelihensiya ako ni Primo og iyang makaon."

"Sus Inday, ako pa nimo biyaan ko na si Primo kay gihimo ka lang mutsatsa. Total 'di man mo kasal."

"Bon-ogon ako ni Promo Mir ug mibahad pa gani nga iya akong patyon oras nga ako siyang biyaan."

"Na bahala ka, naluoy lang ko nimo. O, niay singkuwenta pesos tago-i kana pag-ayo nga dili makit-an anang palahubog. Maayo ra kana kun gutomon ka," dayong lakaw ni Mira.

Maanyag si Virgie ug giilogan sa mga kalalakin-an nga adto magyampongad sa karaoke bar nga iyang gitrabahoan. Usa na niini si Primo nga maoy hawod sa tanang mga istambay. Apan naka-uyab si Virgie ug usa ka Kano nga U.S. Navy nga kauban sa mga visiting forces.

Labihan ang kalagot ni Primo sa Kano nga si Arnold ug ila kining gibanhigan. Na-ospital si Arnold ug wala madugay miuli kini sa Amerika apan misaad kini kang Virgie nga mobalik aron kuhaon siya.

Tulo ka tuig na ang milabay ug wala na gayud magpatim-aw si Arnold ug tungod sa kanunay nga paghasi kaniya ni Primo nakahukom siya nga makig-ipon na lang niini. Milabay pa ang usa ka tuig samtang nanglaba si Virgie, miduol kaniya si Mira ug may gihunghong.

"Unsa? Nia si Arnold -- nagkita mo?"

"Oo, ug dili niya ipasaba nimo ug nahibalo na usab siya nga nag-ipon mo si Primo ug gisultihan nako siya sa tanan nimong mga kaguol," padayon ni Mira. "Walay lain siya nga tuyo dinhi kundili aron kuhaon ka. Magpaabot siya nimo sa iyang gipuy-an sulod sa usa ka semana ug hikayon ninyo ang imong mga papeles human sa inyong kasal."

"Hain man siya magpuyo karon?"

"Dili niya ipasulti kanimo pero ihatud tika oras nga makahukom ka nga mokuyog kaniya. Kuyog ni Arnold, Virgie, kay wala kay mapaabot kang Primo."

Andam na ang dad-onon ni Virgie didto sa balay ni Mira ug sa dihang nakatulog si Primo sa kahubog misakay dayon siya og jeep padulong sa balay ni Mira ug nagkuyog ang duha paingon sa gipuy-an ni Arnold.

Namuti ang mata ni Primo sa pagpinangita ni Virgie. Wala siya masayod kun hain kini paingon. Ang bugtong nasayud kun hain si Virgie mao ra si Mira.

Unom ka bulan lang ang milabay ug nakadawat og sulat si Mira gikan kang Virgie ug tseke nga $200. Matud sa usa ka bahin sa sulat; "Pangitaan ta ka og imong mabana diri." (Kataposan)