Gula 109
Wala ko makatutol dihang kalit lang kong gigakos ni Alva ug unya giukoban niya ang akong ngabil. Kun gihidlaw ug hangol man ko sa sex, si Alva ingon sa nabuang na sab nako kay nangita man god siya’g paagi nga magkakita mi. Mora’g dili siya makatugot nga mabugto sa hingpit ang kutay sa mga panghitabo nga naglambigit namong duha. Ingon sa gihatagan gayod niya’g gibug-aton ang nangagi namong intimate moments.
Hingpit kong mipaundayon sa gibuhat ni Alva. Gusto kong subhan ang gibati kong kahidlaw pinaagi sa init namong romansa. Bahala nag makasala na sab ko ni Agaw Josie nga iyang asawa. Ang importante nga matambalan ang akong kahidlaw pinaagi sa kainit sa mga halok, gakos ug parayeg ni Alva. Mipatigbabaw gyud ang akong unodnong kahuyang.
Tuod man, nahitabo gyud ang dili na unta angay pang mahitabo. Gisalohan namo ni Alva ang dugos sa himaya.
“Wa ka ba mahadlok nga masayran ni Agaw Josie kining imong pagpakigkita nako?” gipangutana ko si Alva.
“Nahadlok,” maoy iyang tubag. “Dili ko gustong mosamot ang iyang kasilag ug kahiubos nako. Labina karon nga nagsabak siya sa una namong liwat. Dili ko gustong maapektohan ang bata nga iyang gisabak. Gusto sab kong magmalinawon na ang among pagpuyo.”
“Nan, nganong nakigkita ka pa man nako?”
Wala dayon motubag si Alva. Miginhawa una siya’g lawom. Unya napahit niya ang iyang wait.
“Maglisod ko’g kontrol sa akong kaugalingon, Editha,” nagkanayon si Alva. “Morag maglisod kog sibog sa ato nang nasugdan. Mag-alindasay ko kun maghunahuna ko nimo. Makabuang ang imong katahom.”
“Sala ni nako kay gitental ko man ikaw sa una,” mao ray akong nasulti. “Kun wala ko pa ikaw tentala, dili unta magubot ang pagpuyo ninyo ni Agaw Josie.”
“Ayaw basola ang imong kaugalingon. Sala ko sab kini kay nagpaanod man ko sa tentasyon.”
Unya, kalit lang nahimong romantiko ang higayon. -- Sumpayan pa