Motingog lang kun ubhon
Naupos na lang ang tikod sa sapatos ni Igong, samtang mamisita siya sa pinuy-anan ni Imak, nga wa gyod makapadayag sa iyang gibati sa dalaga.
"Taudtaod na man gayod kang mamisita kanako Igong, sultihi kuno ako kun unsa gayoy bugtong nimong katuyoan, nga angay kong hisayran?" kausa gisukot siya ni Imak, nga gibati na og dili tiaw nga kahibulong.
Imbes motubag si Igong, sa dalaga ... igo lang kini mosinyas nga daw amang. Naglibog na lang hinuon si Imak, nga wa man diay tuyo ug nganong hasolon pa siya og pakig-atubang?
Dili ikalimod, nga kini si Igong, usa na usab ka ulitawong guwang, ning ilang balangay sa Kiwkiw. Sama usab kang Imak, nanggungis na lang sa hiktanan, wa usab kini makasinati kun unsa ang kaanindot nga bation kun dunay uyab.
Lisod man sad kun siya’y mouna sa pagsulti ni Igong, nga nakagusto siya sa maong ulitawong guwang, ilabi na nga hilabihang estriktaha si Nanay niya Oprit.
"Bahala na lang sad Imak, kun dili ka maminyo, basta ayaw lang gayod pagpanghagad ni Igong, nga nakagusto ka kaniya!" dihay inahanong tambag ni Nanay niya Oprit.
"Basin mahisama ka sa nahitabo kanako ... nga igo lang gipaangkan ... ni Pikto, kay ang kadingding ra diay sa akong kaputli ang gipahimuslan?"
Gabii kadto sa adlaw'ng Sabado. Hilabihang espotinga nga namisita si Igong, ngadto kang Imak. Imbes mopadyag siya sa nag-awas-awas niyang pagbati ... nagpunay na lang hinuon siya og tutok sa kabigot sa lawas sa maong babaye nga maoy nakapasalimuang kaniya.
"Igong ... sultihi ako kun unsay anaa sa imong gibati," sagol pinaluray ang tuno sa sinultihan ni Imak, nga niadtong higayona nagpanghikap dapit sa may bilahan ni Igong.
Takulahaw dihay kalanog sa ubo ni Igong, nga maoy nakapahunong og hikap ni Imak, dapit sa iyang pus-on.
Imbes ubhon na usab unta si Igong, kalit lang kini niyang gipugngan. Naglit-ad-lit-ad siya sa iyang lawas gumikan ba kaha sa kagilok, nga wa gayod hunongi ni Imak sa pag-ugay.
"Hunongaaaaaaa .... ayawwww ... Imakkkk .... kayyyy hilabihanggggg ... giloka!" didto pa makagawas ang tingog ni Igong, sa dihang iyang gigakos og piit kaayo si Imak, nga didto nila tibawasa ang nagpanikad nilang kahidlaw sulod sa may sibay. (Kataposan)
- Latest
- Trending