Ang ‘crush’ ni Merle

Niadtong nagpanuigon pa og trese ka tuig si Merle nag-eskuyla siya sa Grade VI sa Tubigon, Bohol. Aduna siyay "crush" kang Luis nga Grade IV apan nagpanuigon na og disesayis. Pution siya ug ambongan. Ang ubang mga klasmet ni Merle na "crush" usab kaniya.

Usa niana ka adlaw mibisita si Luis. Gipadayon siya sa Inay ni Merle. Mipadayag siya sa iyang gibating paghigugma sa dalaga.

"Bata pa ako ug dili pa ako moapil nianang butanga," giingnan niya si Luis.

"Andam ako nga magpaabot sa imong pagtando. Igo na nga nasayod ka sa akong gibating paghigugma kanimo," matud ni Luis.

"Gikasubo ko Luis nga dili ko madawat ang imong gugma. Managhigala lang ang pagtagad ko kanimo," balibad ni Merle.

Huyhoy ang abaga ni Luis nga nanamilit nga moadto na lang siya. Nabalaka si Merle nga dili na si Luis mobalik.

Gisukmatan si Merle sa iyang ig-agaw nga si Lorena nga klasmet usab niya ug nga na "crush" usab kang Luis, sa dihang iyang gisuginlan.

"Kaanugon nga wala nimo sugta si Luis nga nangulitawo nimo. Ako pa diay ang giulitawhan, sugton ko gyud siya."

"Mao man god ang gitugon ni Inay," matud ni Merle." Bata pa ako ug dili pa angay manarato."

Migraduwar na si Merle sa elementarya. Ug sa dihang mianhi sa Cebu ang iyang inahan kauban sa iyang amahan nga nagpatambal sa Don Vicente Sotto Memorial Hospital, miuban siya. Dugay nga wala makabalik si Merle sa Tubigon kay gipatungha siya sa iyang iyaan, igsoon sa iyang amahan, sa first year sa high school sa Abellana National High School.

Niadtong nagbakasyon na miuli na siya sa Tubigon, nagkita sila si Luis.

"Maayo man, apan nag-antus sa tumang kaguwapa," komedyang tubag sa dalaga.

Apan ang Luis nga kaniadto ambongan. Nausab na man sa pagtan-aw ni Merle. Budlat na man ang iyang mata ug ang iyang mga ngipon gagmay man diay. Wala na man siya ma "crush" kang Luis. Ang iyang gibati kaniadto tingali mao ang gitawag nilang "puppy love." (Kataposan)