Nag-family planning sila si Otik ug Masay

Jasaan, Misamis Or.

Puro batan-on kini sila si Otik ug Masay ug tungod niini, nakahunahuna na sila pagplano sa ilang pamilya. Ilabi na gayod si Masay kay dili niya buot nga mawala ang iyang figure.

Matud pa ni Masay, nga daghan na sa iyang mga higala nga naghitsura na nga tigulang tungod kay wala  magplano sa pamilya. Bisan ang iyang manghod nga igsuon nga sayo usab nga naminyo, daw magulang na hinuon kining tan-awon kay kaniya.

Apan, kun si Otik ang pagbut-on, dili siya mosugot nga magplano sa pamilya. Kini kuno ang pagplano sa pamilya, maoy pagmatuod nga ang tawo nagsupak kuno sa kabubut-on sa Diyos.

"Ang gusto ko," pulong ni Otik. "Kun mahimo usa ka dosena ang   atong mga anak, ang Diyos mao ang magbuot."

"Unya kun magdaghan ang atong mga anak," tubag ni Masay. "Naay Diyos nga mohatag og pagkaon? Basta! Dili ko gustong magdaghan ang atong mga anak. Naa ra ikaw ay! Bisag minyo na, motan-aw pag dalaga nga nindot ang dughan."

Tungod kay si Masay man gayod ang nagbuot mao nga nagplano gayod ang duha sa ilang pamilya. Busa, usa ka adlaw, didto na si Masay sa health center aron mangutana kun unsay himuon para mag-family planning. Nalipay ang doktor sa hukom ni Masay. Matud pa niini, nga kun pareho lang ang tanang tawo kang Masay, walay problema ang gobiyerno pagpugong sa pagdaghan sa tawo sa kalibotan. Naay uban diha nga tagnapulo ang anak, apan, nagsige pa gihapon pagpanganak.

Mao kini ang problema sa gobiyerno. Husto si Masay nga dili problema sa Diyos kun modaghan ang tawo sa kalibotan kay dili man ang Diyos mao ang magpakaon sa tawo.

Milampos gayod si Masay ug ang iyang gipili sa pagplano sa pamilya, mao ang pills kay kuno safe kini sa panglawas sa tawo kini matud pa usa usab sa gisugyot sa Doktor. Naay uban diha nga ang gigamit IUD apan daghan usab ang wala moangay niini. Mao gayod kini ang tawo nga wala magkapareho ang hunahuna.

Unya nagsugod na ang magtiayon sa ilang plano. Si Otik, daw nagduhaduha gayod nga molampos sila kay ang iyang gihunahuna mao ang iyang kaugalingon nga morag nagtuo siyang dili gayod siya makaagwanta. Pastilan! Unsaon na lang og  magkinahanglan ang iyang lawas. Naseguro niya nga dili siya  makaagwanta. Nindot man god ang lawas ni Masay. Kana ganing magpatutoy siya sa ilang anak, kahanggabon dayon si Otik sa dughan ni Masay. Busa, agig pagpasiandayon sa gusto sa asawa, misunod si Otik.

Unya nagsugod sila. si Otik adto mohigda sa lantay duol lang sa lawak sa asawa. Ang pait ra ba kay usa ra ang ilang moskitero, mao nga nag-inusara lang si Otik nga naghigda. Ug sa unang gabii, nagkapuliki siya pagdagpak sa lamok.

Pagkabuntag sayong mibangon si Otik. Nakita niya nga sayong nagpatotoy sa bata si Masay ug sa iyang pagpatotoy, gisud-ong ni Otik ang dughan ni Masay. Unya, nakita pa usab niya ang panti niini nga maayo pagka walis hinungdan nga migimok na usab ang pagkalalaki. Kutob lang sa pagpanakla si Otik.

Ikaduhang gabii, mao gihapon ang nahitabo nga si Otik daw dili duawon sa katulogon bisan lawom na ang kagabhion. Nag-alindasay siya ug ang iyang hunahuna, naa ra gayod sa asawa.

Sa adlaw Biyernes, daw dili na gayod maagwanta ni Otik ang kahinam ngadto sa asawa. Namatikdan nga ingon sa mohugot kanunay ang karsones ni Otik. Bisan kun unsay iyang buhaton, si Masay ra gayod ang naa sa iyang hunahuna.

Busa, pagka gabii sa adlaw’ng Biyernes, human nilang panihapon nagbuklad na si Otik sa banig. Diha sa iyang hunahuna nga kamangon si Masay. Bahala na kun masuko kini. Ang mahinungdanon, nga matuman ang iyang gusto. Unya dihang natulog na ang bata, mibangon si Otik ug misulod sa mosketiro.

"Hup! Ayaw baya kalimot sa atong sabot," pulong ni Masay.

"Honey! I love you," ni Otik nga ingon sa gidaman dihang gihikap niini ang dughan ni Masay. "Puwede karon na, Honey."

"Unya unsa mang adlawa karon?

"He-he-he! ABADO!" (Kataposan)