Sa laing panahon paaboton ko ikaw

Wa makapugong si Regina sa pipila ka lusok sa iyang mga luha. Naghimo kini og dalan-dalan sa iyang duha ka aping. "Sala sa Diyos kining nahitabo nato, Manuel." Gipahiran ni Regina ang iyang luha sa gikuptan niyang panyo.  "Oo, Regina. Apan may kasingkasing kita nga maantigong mahigugma." Gikuptan ni Manuel ang duha ka abaga ni Regina. Iya kining gigakos.

Mibakho si Regina sa dughan ni Manuel.

"Nganong nahitabo kini kanato, Manuel? Nganong kita pa man gyod?"

"Gihatagan kita sa Diyos og kagawasan nga mamili, Regina."

"Apan may panahon pa, Manuel, nga di kita makabuhat og hingpit nga sala sa kabubut-on sa Diyos."

Nangagho si Manuel. Nakabatyag siya og kasakit sa dughan.

"Nganong karon pa man, Regina? Nganong karon pa man kita nagkita?" Si Manuel na usab ang wala makapugong sa pagpangutana sa babaye.

"Lisod gyod tugkaron ang kabubut-on sa Diyos, Manuel."

Usa kadto ka panahon sa ting-ulan. Usa ka panahon nga nagkabagat ang dalan ni Regina ug Manuel sa dalan Colon. Nagdali siyang milabang sa pikas dalan aron adto mag-atang og sakyanan alang sa iyang pagpauli. Nadakin-as siya sa kadanglog sa dalan. Ug si Manuel ang nagpatindog kaniya.

Kadto ang sinugdanan sa ilang panagkaila ug panagkita. Usa ka panagkita nga nasundan pa. Usa ka panagkita nga maoy naghatag kanila og dalan aron sila magkahigugmaay.

Ug karon pa nila mamatngoni ang tumang komplikasyon sa ilang relasyon. Dili diay angay nga mosulod sila sa maong kahimtang.

"Sakit kaayo, Manuel, nga kanus-a nga nakat-on na kita pagmahal sa usag-usa, gisamok sab kita sa atong konsensiya."

"Lisod pakigbatokan ang tulisok sa tanlag, Regina. Usahay, makahilak ako sa akong lawak. Lalaki ako, apan gibuntog ako sa akong emosyon. Mao nga ibalik nato ang atong kasingkasing ngadto sa Diyos."

Mihuros ang hangin sa kahaponon.

"Gaksa akog hugot, Manuel. Usa ka panamilit nga gakos."

"Sa kataposang higayon, oo, Regina."

Unya nag-abot ang ilang mga ngabil. Taphaw nga panaghalok. Nagum-os ang ilang kasingkasing sa pagpugong sa tagsa-tagsa nila ka pagbati.

Ug ang Plaza Independencia nga ilang nahimutangan maoy bugtong saksi sa pagkatul-id sa nahisalaag nilang pagbati. Gianugnan sila sa higayon nga nagkabagat ang ilang kasingkasing. Apan gipangayo usab sa higayon nga angay silang magkabulag.

May gihunghong si Regina. "Paaboton ko ikaw sa laing panahon, Manuel."

Mibalos paghunghong si Manuel. "Maghuwat ko, Regina. Paaboton ko usab ikaw sa laing panahon."

"Hapit na motikyop ang kagabhion, Manuel. Ugma, laing panahon na sa atong kinabuhi."

"Oo, Regina. Pagsidlak sa adlaw ugma, laing kinabuhi na ang mag-ulang kanato."

Mibiya si Regina. Hinay ang iyang mga lakang. Unya mihunong siya. Milingi.

"Adto na ko P-Padre Manuel."

"Goodbye, S-Sister Regina." — Kataposan