Ang text

(Gula 6)

Nahilom sa makadiyot si Leon Gernale human makasulti sila si Althea Moran ug Atty. Quilaton. Si Rey Corpuz nagpakahilom lang, nagpaabot kun unsay sunod mahitabo. Apan nakasabot siya nga ingon sa wala mahimuot si Leon Gernale sa pagkuha ni Althea sa iyang serbisyo aron pag-imbestigar sa kaso sa pagkalambigit sa VPL sa pagpayuhot og peke nga mga tambal.

“Imposible man tingali nga may sindikato nga mogamit sa ngalan sa VPL alang sa usa ka illegal nga transaksiyon,” mitingog si Leon Gernale pagkataudtaod.

“Dili imposible, Mr. Gernale,” nagkanayon si Atty. Quilaton. “Hinumdomi nga ang VPL naila nga nag-unang exporter og pharmaceutical products ngadto sa ubang kanasoran. Wala kita moangkat og mga produkto gikan sa gawas. Nan, nganong diha may shipment sa peke nga mga tambal nga giadres sa VPL nga na-intercept sa mga awtoridad? Posible gyud nga usa ka sindikato ang nagpaluyo niini ug buot lamang iduhig sa illegal nilang buhat ang ngalan sa VPL.”

Wala na motingog si Leon Gernale.

“Kun aduna kamoy makuhang kasayoran nga makatabang sa imbestigasyon nga ipahigayon ni Mr. Corpuz,” ni Althea pa, “pahibaw-a dayon siya ninyo. Gusto kong masulbad na kining kasoha aron makabalik  na sa operasyon ang VPL. Dako na kaayo ang alkanse sa VPL sukad sa pagpasera niini.”

Nagkasabot sila. Human sa meeting, nag-iyahay nag panggawas ang mga sakop sa management and staff sa VPL sa venue. Nagpabilin sa sulod sila si Atty. Quilaton, Althea ug Rey Corpuz. Duna silay gipanagsultihan.

Human sa ilang panagsulti, nananghid na si Atty. Quilaton nga mopauli na kini. Sa nakalakaw na ang abogado, nananghid na usab si Rey kang Althea nga mobalik na siya sa Royal Suite sa Venus Park Intercontinental Hotel nga maoy gipapuy-an ni Althea kaniya.

“Mokuyog ko nimo,” ni Althea pa.

Mikuyog tuod si Althea kang Rey ngadto sa giabtan niyang hotel. Ug sulod sa mabugnaw’ng lawak may nahitabo na usab kanilang seksuwal nga panagtagbo. — Sumpayan pa