Third time lucky ba kaha alang ni DiCaprio?

Magmalampuson na kaha si Leonardo DiCaprio sa ikatulong higayon? Sa miagi niyang duha ka nominasyon isip Best Actor sa prestihiyosong Oscars kon Academy Awards, pakyas ang bangiitang aktor pagsakmit og tropeyo. Una niadtong 1993 sa lilas nga "What's Eating Gilbert Grape" ug ikaduha niadtong tuig 2005 sa salidang "The Aviator."

Sa ikatulong higayon, ang usa sa labing hayag nga bitoon sa Hollywood misulbong na sab isip kandidato pagka "Best Actor" sa gikahinaman nga 79th Oscar Awards nga gikatakda karong Domingo (Lunes sa buntag dinhi sa Pilipinas) didto sa Kodak Threater.

Paborito si DiCaprio nga modaog sa maong kategoriya gumikan sa maayo ug maanindot kaayo niining pagdala sa lilas nga "Blood Diamond". Gani matud pa ni Eleanor Ringel Gillespie sa Atlanta Journal-Constitution nga "The movie's not a gem, but DiCaprio's performance is."

Sa maong pelikula, si DiCaprio midala sa papel ni Danny Archer, usa ka South African smuggler nga nakig-alyansa sa usa ka mananagat nga si Solomon Vandy (Djimon Hounsou) nga nakakaplag og talagsaon kaayong Pink Diamond sa minahan diin ang naulahi gipuwersa pagpatrabaho sa mga rebelde.

Dalaygon kaayo ang pag-arte ni DiCaprio ug daghan ang nagtuo nga hayan nga makab-ot na gyud niya karong tuiga ang maong pasidungog nga gidamgo ug gi-ambisyonan nga dag-on sa bisan kinsang artista sa Hollywood.

Apan sama sa niagi, daghang malisud nga babag sa dalan ni DiCaprio pagdaog og Oscar award. Kini gumikan kay mga bangiitan man sab ang iyang mga kaatbang pagka-Best Actor.Akong gipasabot mao sila si Will Smith sa "The Pursuit of Happyness", Peter O'Toole sa "Venus", Forest Whitaker sa "The Last King of Scotland" ug si Ryan Goosling sa "Half Nelson."

Impresibo sab ang pagdala sa nahisgutang mga artista sa tagsa-tagsa nila ka pelikula, apan sa way kurat nakong panagna, dako kaayo og tsansa si DiCaprio nga mo-alsa og gold-plated nga tropeyo atol sa Oscar Awards ingon man si Djimon Hounsou isip "Best Supporting Actor."

TRIVIA:Upat sa mga blockbuster nga pelikula ni DiCaprio namatay ang iyang karakter. Kini naglangkob nilang Romeo Montague sa Romeo and Juliet, Jack Dawson sa Titanic, Billy Costigan sa The Departed ug Danny Archer sa Blood Diamond.