Dennis nahiubos gihapon

Daghan gyud ang nahibulo'ng wala motambong sa special advance screening ang mga bida sa pelikula'ng "Txt" nga sila si Angel Locsin ug Dennis Trillo niadtong milabay nga Martes sa Podium Cinema.

Si Oyo Boy Sotto lang ang miabot kauban na ang iyang amahan nga si Vic Sotto ug ang uyab niining si Pia Guanio.

Ang tsika mao nga adunay taping sila si Angel ug Dennis maong wala niini mahimo'ng motunga sa nahisgutan'g advance screening. Apan miingon ang mga himantayon nga mabaw ra ang maong rason tungod kay dali ra man ang pagpananghid nga dili lang una mag-taping aron motambong sa special screening sanglit sila maoy mga bida.

Midugang ang mga himantayon nga angayan gyud unta nga molugwa ang duruha tungod kay ang maong pelikula gihatagan og grade nga "A" sa Cinema Evaluation Board.

Pwes ang mga balhibuon og baba nakakoykoy gyud og tsismis nga matud pa ang hinungdan nganong wala si Dennis tungod kay nangluod pa gihapon kini nga gihulipan siya ni Richard Gutierrez sa Mano Po5.

Matud pa nga hangtud karon wala pa gihapo'y gihatag nga tin-aw nga rason ang Regal Entertainment kabahin sa pag-katangtang ni Dennis sa original cast.

Pong pa sa mga himantayon nga adunay lawom nga tinubdan ang pagpangluod ni Dennis Trillo kang Mother Lily Monteverde.

Ang tsika nagkanayon nga diretso'ng gipanumpa ni Mother nga ihatag ang maong proyekto nila ni Dennis nga sa ulahi, lain diay ang mobuhat niini.

Mismo ang manager pa ni Dennis nga si Popoy Caritativo ang miawhag nga iapil sa casting si Christian Bautista kay sa revision sa script, gihimo nilang singer ang ka-love triangle unta nila ni Dennis ug Angel Locsin.

Gisuwayan sa mga tsikadora nga mahinabi si Popoy kabahin sa isyu apan wala kini makontak.

Bong milarga, magpa-check-up

Nilangyaw kagahapon si Sen. Bong Revilla ug ang asawa niini nga si Lani Mercado padulong sa America para mag-bakasyon ug magpa-check usab sa back pain nga kanunay mabatyagan sa nahisgutan'g senador.

Suma pa sa doktor ni Bong diri sa nasud, adunay migrabe'ng problema ang senador sa iyang spinal column. Resulta kini sa mga stunts nga iyang mga gihimo niadto sa iyang mga action movies.

Gusto mokuha og second opinion si Bong maong nilangyaw kini sa America. Pong pa sa Executive Producer ni Bong sa show niya'ng "Hokus Pokus," nakaresirba ang senador og duha ka episode sa nahisgutan'g show maong puwede ra siya magdugay didto sa US og duha ka semana.

Karon'g gabii sa Hokus Pokus, guest sila si Wilma Doesn't (Reyna Ling-ling) ug si Valerie Concepcion (Donna). Mag-camping ang mga taga-HP kuyog ni Donna apan ma-hostage sila sa rayna sa mga amasona nga si Reyna Ling-ling.

Christine ug Mike na

Tinuod gyud diay ang taho nga na-develop ang mga batan-ong artista nga sila si Christine Reyes ug Mike Tan samtang gihimo pa nila ang ilang pelikula nga "Barang" sa Vigan, Ilocos Sur.

Nakita pa sa mga himantayon nga sweet gyud kaayo ang duha sa dihang nanan-aw kini sa maong pelikula sa SM North EDSA ug nag-holding hands pa.

Tuod man, wala man sad gilimod ni Mike nga lahi gyud ang iyang nabati para kang Christine samtang nag-shooting sila. Sa usa ka interbyu niya, iya gyud gipadayag unsa sila ka malipayon ni Christine niadto'ng nag-shooting pa sila sa Vigan.

Sa nahisgutan'g pelikula, si Christine ug Mike ang mga batan-on nga mibisita sa Vigan aron magbakasyon. Uban nila ang usa ka higala nga adunay importante usab nga role sa pelikula.