Miriam buwag nas bana, nagpakahilom

Wala pa gihapoy komento si Miriam Quiambao kalabot sa balita sa Philippine Star niadtong Domingo, nga nagkanayon nga kumpirmado na nga buwag na siya sa iyang Italian husband nga si Claudio Rondinelle.

Nasayran sa PangMasa nga gikatakda unta nga mokomento si Miriam sa S-Files niadtong Domingo apan matud pa wala kini makontak tungod kay kasamtangan kining tua sa Korea.

Nasayran usab sa PangMasa nga bisan asa na lamang sila si Miriam ug Paolo Bediones nga nasud moadto tungod sa taping sa ilang bag-ong travel show nga gikatahong ipasalida na karong Domingo.

Hinoon matud pa nga misaad si Miriam nga magpa-interview sa S-Files karong Domingo na lang.

Daghan ang naglisud pagtoo sa maong balita tungod kay bag-ohay lang sila nga nagpakasal ni Claudio didto pa sa Boracay niadtong January 2004.

Apan ang beterana nga kolumnista sa PangMasa Lolit Solis miingon nga dunay mihagawhaw niya nga wala sa Friendster account ni Miriam ang dagway ni Claudio. Anaa hinoon ang picture ni Hans Montenegro nga ex-boyfriend sa kanhi Miss Universe First Runner-Up.

Jolo ug Grace way paglurang

Dili na manghilabot si Lolit Solis sa relasyon nila ni Jolo Revilla ug Grace Adriano tungod kay matud pa niya, super inlove ang duruha sa usag-usa.

Gani matud pa niya nga padayon pa man sila nga magkita, bisan pa og si Grace atua sa Baguio City nagpadayon karon sa iyang pagtuon.

Nanghinaot hinoon ang beteranang kolumnista sa PangMasa, nga magtarong og tungha ang duruha alang ra usab sa ilang kaayohan tungod kay swerte sila nga dunay buotan nga mga ginikanan sama nila ni Senador Bong Revilla ug Lani Mercado.