Extra Challenge magdugay pa?

Giklaro ni Melo Esguerra, Production Manager sa "Extra Challenge" nga wala pay giingon ang GMA-7 nga sa Mayo 26 na lamang kutob ang maong reality-based show sama sa mga nanggawas na nga taho.

Suma pa niya ngadto sa PangMasa nga duna pay ubay-ubay nga mga episodes nga ilang gigama karon lakip na niini ang "No Politics" nga maglangkob ni Chief of Staff Mike Defensor ug Cavite Congressman Gilbert Remulla.

Midugang siya nga maghimo pa usab sila og solo nga challenge sama sa gihimo ni Angel Locsin two weeks ago.

Apan miingon sa Esguerra nga musogot ra usab sila nga tak-opan na ang "EC" tungod kay nakagamot na man usab sila ug ang labing lisod nga mga pagsuway ila na nga nahimo.

Miingon siya nga malipayon ra sila nga bisan tuod mikunhod ang ilang rating, wala usab kini miubos pa sa 25%, samtang wala niya ilimod nga gipilde sila sa "PBB Teen Edition" last week og mga pipila ka porsiyento.

Dugang pa niya nga nasayod sila nga gikapoy na usab si Paolo Bediones tungod kay sukad sa pagsugod nila pipila ka tuig na ang milabay wala man gyud kini mahulipi isip host.

Gani matud niya nga naluoy na sila kang Paolo sanglit bisan og gikapoy na kini kon ugaling duna silay taping nga matunong og Domingo, mobutho man gihapon ang nahisgutan sa "S-Files."

Pong pa niya nga dili usab malikayan nga magbalik balik ang mga artista sanglit pipila lang ang desidido gyud nga moapil, gani duna pa may uban nga moatras gayud inay sugdan na ang taping.

Jologs, QTV na?

Samtang giklaro usab ni Esguerra nga dili ang personal life ni Ethel Booba ang hinungdan nganong gitak-opan na ang Jologs tungod kay ang original nga plano usa ra gyud kini ka bulan.

Ang Jologs, matud pa ni Esguerra maoy gihulip sa "StarStruck 3" samtang nagpaabot pa sila nga masugdan ang taping sa "Kakabaka-Boo"ni Chaka Doll nga magsugod na karong gabii.

Miingon siya nga dunay plano nga ipadayon ang Jologs ngadto na sa QTV 11 gumikan kay maayo man ang rating niini sa GMA7, apan dili siya sigurado kong sila si Ethel Booba, Rainier Castillo ug Pekto pa ba gihapon ang himoong hosts.

Christine bag-og sakyanan

Natuman na ang pangandoy ni Cristine Reyes nga makapanag-iya og kaugalingong sakyanan gikan sa iyang kinitaan.

Sulod sa duha ka tuig, gitigom ni Christine ang iyang talent fee gikan sa iyang mga shows, lakip na ang bayad niya gikan sa "Darna" ug sa movie nga "Apoy Sa Dibdib Ng Samar" with Pampanga Governor Mark Lapid.

Matud pa nga ang talent fee niya sa maong pelikula maoy gibayad niya nga -downpayment (50%) sa iyang Starex. Busa karon duna na siyay kaugalingong sakyanan sa matag higayon nga motunga siya sa set sa bag-o niya nga digital movie nga giulohan og "Pitong Dalagita" ubos sa OctoArts Films.

Kauban niya sila si Nadine Samonte, Yasmien Kurdi, Iwa Moto, Valerie Concepcion ug Angelica Panganiban, sa direksyon ni Chris Pablo.