Pagpadayon ni Top

Human siya nagpakahilom sa dihang mibiya siya sa banda nga Freestyle pipila na ka buwan ang milabay, siya mibalik ug subling mihimo og kasikas isip solo performer.

Hangopa, abibahi ug duyogi ang pagbalik ni Top Suzara sa natad sa musika kauban ang labing una niya nga album isip solo performer nga giulohan og "Carry On," diin nagtangag kini og katorse ka mga kanta, nga giliminan og nagkadaiyang emosyon bunga sa tinood nga gibati ni Top niadtong mga adlaw sa iyang pagpakahilom.

Dili na kahibudngan kon nganong katorse gyud ka kanta ang nalakip sa Carry On album sanglit, si Top naila naman isip maayong mang-aawit nga takos usab pagmugna og mananoy nga tuno nga haom sa iyang musika. Gani nahibaw-an man nga makahimo si Top paghuman og tulo ngadto sa upat ka kanta sulod lang sa usa ka adlaw.

"Sabihan Mo Na," ang carrier single sa nahisgutan nga album diin usa ni ka kanta labot sa gugma, nga sa sinugdanan nagtuki kalabot sa pagpangayo og pasaylo hangtod na nga misampot ngadto sa pagsaad sa walay kinutuban nga pagbati. Ang mao nga kanta nahimoan na usab og music video diin nagpadayon kini nga usa sa labing paborito sa mga tumatan-aw sa MYX.

Laing kanta nga lakip gihapon sa maong album ug gikagubtan usab sa mga suki sa NU-Rock 107 mao ang ' On The Sand," diin sa dili madugay mamahimo na kini nga entry alang sa hit list sa nahisgutan nga estasyon.

Ang nahisgutan nga album naglakip og nagkadaiyang mga kanta nga siguradong mohaom sa estilo sa musika sa matag estasyonan sa radyo busa gipaabot nga maglanog-lanog gayud ang maong mga awit sa tibook suok sa nasud.

Apan ang paborito ni Top sa tanang kanta nga nalakip sa Carry on album mao ang sentimental nga kanta nga dunay titulo nga " Angel Eyes" diin ang mga tawo nga nasinati na nga gitalikdan sa ilang mga minahal sigurado gayud nga mahinuklog sa maong awit. Ang tagalog version sa maong kanta nga dunay ulohan nga " Magpakailanman" nga maoy mas ganahan sa mga tawo sanglit "pangmasa ang dating."

Hinoon dili tanang kanta sentimental sanglit duna man usay gaan lang ang tema sama sa "Overcast" kalabot sa mga simple ra nga kalipay. Ang Carry On album, kombinasyon sa folk, rock, New Wave ug pop nga matang sa musika. - PR