Kawatan og esena

Mangilog og microphone kay mokanta gyod siya kon dunay mag sing-along sa bisan unsang panagtigom ug mosinggit gyod kon dili pakantahon, ug kay bisa'g sipat ug usahay badlongon, pinangga sa nagkugos niya sama kanila ni Roger Serna, Edgar Escalante ug uban pa, busa, niadtong pag birthday niya niadtong Marso 17 didto sa ila, kini si Dancel Marx R. Diada gipadad-an gyod og mga pagkaon sa ilang panimalay nila ni Josie S. Pereyra-ugangan ni Edgar Escalante, ug ni Roger Serna, sa mga lolo, mga lola ug mga uyoan. Gani, usa sa absentee nga nagkugos niya, si Mr. Johnny Usselton sa Usselton Oil Company sa Tennessee, USA, nagpadala og dako dakong kantidad alang kaniya, kay kini si Mr. Usselton, kon moanhi sa Pilipinas malingaw gyod niining tres anyos nga bata, nga gusto gyod mag-artista og buot na gyong mokuyog sa ilang apohan nga karon apil sa usa ka teleserye nga gigaling.

Mga radio personalities, mga artista maoy pipila sa mitambong sa iyang birthday niadtong Marso 17 sa gabii sama kanila ni Tess Diez, Christian Gumba Tariman, Felipe Tariman, Jr., Felipe Tariman, Sr., Hengie Tablason (sa Pro-Life) ug uban pa gawas sa mga ninong ug ninang ug Banat reporter Brenda Batuto kinsa, nalingaw sa tres anyos nga bata nga badlongon apan, kawatan og esena. Nangawat usab siyag esena pag-celebrate ni Aisha G. Relatado sa iyang high school graduation. Si Aisha usab, sa bata pa nakaapil sa duha ka telemovie, ang "Mangisda" nga gihimo ni Yolanda Wong sa YKY Productions ug sa "Alimatok" nga gihimo sa Lure Entertainment. Kining duha, pulos naapil sa telemovie festivals kaniadto.

TIDBITS: Naghimo kono ang Ramon Aboitiz Foundation ug usa ka pelikula nga dunay dako nga budget, ug sa pagka karon, anaa na gani kono ang mga kahimanan nga gamiton alang sa shooting sa temporaryong opisina (alang lamang sa maong tuyo) diha sa Vicente Urgello sa Sambag 2 sa siyudad sa Sugbo.

Si direktor Emmanuel Hombrebueno Borlaza, iladong award winning direktor sa Manila, duna konoy himoong teleserye alang sa usa ka TV station dinhi sa siyudad sa Sugbo, ug usa gyod ka Binisaya nga teleserye busa, sa pagka karon, nag scout na ang iyang mga kahigalaan dinhi ug mga artistang bag-o alang sa mga importante kaayong mga papel sama sa leading man ug leading lady, nga mga maayo gyod og pamarog ug panagway, ug labaw sa tanan, andam mo undergo og usa ka adlaw nga workshop nga way allowance. Alang sa mga kasayuran, ang interesado mo-contact nila ni Pepe Tariman (0921-4527120) ug Tess Diez (0910-7000471.