Rica gipasidan-an sa mga moralista

Gipasidan-an sa nagkadaiyang grupo sa mga moralista ang young actress nga si Rica Peralejo sa dili pagpalabi og pa-sexy sa higayon nga mogawas siya sa telebisyon tungod kay hilas kining tan-awon.

Nagkanayon ang mga moralista nga nanubra na ang ka mubo sa mga sapot ni Rica diin hapit nalang kini nga maghubo ilabi na sa iyang dance segment sa ASAP Mania matag Domingo.

Gidugang nila nga niadtong September 11 atol sa nahisgutang variety show labihan ka sexy ni Rica pun-an pa nga ang sinayawan niini susama og naa sa night club.

Suma pa sa maong mga grupo nga angayan nga magmatngon si Rica gumikan kay labihan ka daghan sa mga bata ang motan-aw sa ASAP ilabi na nga matag Domingo kini makita.

Kahinumduman nga si Rica nagsugod kaniadto isip child star pinaagi sa programang "Ang TV" sa Abs-cbn hangtud nga nabatan-on na siya og nahimong bida sa mga youth oriented shows nga giatngan og gisunod pag-ayo sa mga televiewers kaniadto.

Apan mihupas ang ka sikat ni Rica hinungdan nga nidesisyon kini nga mag-pasexy sa iyang mga pelikula pinaagi sa iyang launching movie nga "Balahibong Pusa" kauban si Jay Manalo.