Baste, ipina-subpoena sa impeachment trial
MANILA, Philippines — Ipinasubpoena ng prosecution panel sa Senate impeachment court si Davao City Mayor Sebastian “Baste” Duterte kaugnay ng pagpiprisinta ng ebidensya sa Gencorp., isa sa mga kumpanyang idineklara ni Vice President Sara Duterte sa kanyang mga negosyo.
Hiniling ni Lead Prosecutor Gerville Luistro (Batangas, 2nd District) ang subpoena, na ipinaliwanag ni House Trial Spokesperson Zia Alonto Adiong (Lanao del Sur) bilang bahagi ng Article II (unexplained wealth).
“Hindi siya tinatawag dahil kapatid siya ni VP Sara. He is being called because he may have relevant personal and official knowledge concerning matters that form part of the prosecution’s Article II presentation,” ani Adiong.Mahalaga ang Gencorp sa paglalahad ng umano’y paglobo ng yaman ni VP Sara, dahil mismong siya ang tumukoy rito sa kanyang Statements of Assets, Liabilities and Net Worth (SALN).
Noong Martes, iprinisinta ng prosekusyon ang SALN ni Duterte mula sa Office of the Ombudsman bilang opisyal na ebidensya. Sa darating na Setyembre 21 at 22, nakatakdang iprisinta si Atty. Gerardo Del Rosario, Director ng Securities and Exchange Commission (SEC), kaugnay ng listahan ng mga negosyo ni VP Sara at ng kanyang asawa na si Atty. Manases “Mans” Carpio.
Batay sa ulat, nakatanggap ang Gencorp ng P14.32 milyon mula sa transaksiyon ng Pamahalaang Lungsod ng Davao mula 2022 hanggang 2025, bahagi ng kabuuang P15.02 milyon na kontrata, kabilang ang P696,829 mula sa PhilHealth regional office sa Davao.
- Latest
