P1.4M gibana-banang danyos sa sunog sa bodega diha sa Mabolo

CEBU, Philippines — Gibana-banang nikabat ngadto sa P1.4 milyon ang kadaot sa nahitabong sunog sa bodega sa Vic Enterprises diha sa St. Jude Street, Barangay Mabolo niining siyudad niadtong Martes sa tungang gabii.

Usa ka concerned citizen ang nitaho ngadto Cebu City Fire Station kalabot sa nahisgutang sunog.

Ang maong sunog gipaubos ngadto sa first alarm ala1:06 sa kaadlawon kagahapon.

Paspas nga nikatap ang kayo sa sunog diha sa mga materiyales sulod sa bodega.

Nakontrolar ang kayo mga alas 1:14 sa kaadlawon ug gideklarang hingpit na’ng napalong ala 1:24 sa kadlawon sa maong adlaw.

Sa wala pa ma-report ang insidente, namatikdan ni Ronieglen Lopez, 20, mekaniko sa bodega ang aso nga nigawas gikan sa building mga alas 11:00 sa gabii niadtong Martes.

Si Lopez nagpuyo kauban ang ubang trabahante sa mga housing facility nga gihatag sa kompaniya duol sa bodega.

Base sa taho nga pag-abli ni Lopez sa bintana nakita niini nga dako na ang kayo sulod sa building.

Nisulay sila sa iyang mga kauban sa pagkuha og tubig aron mapalong ang kayo apan wala na kini matabang hinungdan nga gipukaw na lang niya ang iyang mga kauban aron makagawas.

Niabot sa 13 ka indibidwal nga sakop sa unom ka pamilya nga mga empleyado sa hardware store ang naapektohan sa sunog. Hinuong walay gikataho nga naangol sa maong insidente

Samtang padayon ang imbestigasyon sa mga otoridad pagtino sa hinungdan sa sunog. (BANAT NEWS)