Mga iskolar sa probinsiya mag-tutor sa mga bata

CEBU, Philippines — Gilaoman nga motabang isip tutor sa ilang mga komunidad ang mga iskolar sa Cebu Province - Grants Intended for Tertiary Students (CP-GIFTS).

Kini pinaagi sa bag-ong programa nga isugyot ni Bokal Christopher “Dong” Baricuatro diin ang maong inisyatibo ubos sa kasamtangan Academic Recovery and Accessible Learning (ARAL) program.

Matud ni Baricuatro nga ang ARAL program ubos kini sa tutor basis ug ang mga CP-GIFTS iskolar ang motudlo sa mga bata diha sa ilahang tagsa-tagsa ka mga komunidad.

Matutok ang ilahang pagtudlo ngadto sa numeracy ug reading isip tubag sa reading crisis sa Pilipinas.       

Gipasabot ni Baricuatro nga ang maong lakang dili kini matawag nga bayad sa mga iskolar sa benepisyo nga ilang nakuha apan pamaagi kini nga makatabang sila ngadto sa ilahang mga komunidad.

Ug aron masigurado nga ang mga iskolar nag-tutor kini kinahangalang adunay dokumentasyon ug mo reach-out sila sa kapitan sa barangay, magtutudlo, ug sa mga ginikanan.

Adunay ipahigayong objective assessment alang sa mga bata diin sa dili pa magsugod ang ilang tutorial i-test kong asa kutob ang ilang kahibalo ug pipila ka buwan gikan niini mo-take sila og balik sa assessment aron makita ang kalamboan ug ang lebel sa reading ug numeracy.

Sa pagkakaron, ang maong programa dili pa opisyal ug pormal pa nga iduso ni Baricuatro sa sunod semana, Hunyo 2, 2026.  Andriya Valerie Y. Villarino, CNU-Journalism intern/BDB BANAT NEWS