Archival: Cebu City adunay kapin sa P1 bilyon nga deficit

CEBU, Philippines — Si Cebu City Mayor Nestor Archival, Sr. nipahigayon kagahapon sa iyang unang State of the City Address (SOCA) diin iyang gihikyad ang mga nahimo ug direksiyon sa administrasyon sa pagdumala sa siyudad.

Gibutyag ni Archival nga adunay budget deficit ang siyudad nga nikabat ngadto sa P1,120,658,101.96 base sa record niadtong Hunyo 30, 2026.

Bisan pa niini, gipasalig ni Archival nga ipadayon sa administrasyon ang mga programa ug reporma aron mapalig-on ang serbisyo publiko sa siyudad.

Gihisgota ni Archival ang iyang 10-point agenda nga naglangkub sa health, food security, agrikultura, edukasyon, negosyo, climate resilience ug imprastraktura, housing, traffic mitigation, public safety, quick response, revenue generation ug ubang programa.

Usa sa gitumbok sa mayor mao ang pagpalig-on sa food security ug environmental sustainability ubos sa pakigtambayayong sa Department of Agriculture alang sa liboan ka benepisyaryo, pagtukod sa model farms ug hydroponic greenhouses ug pagpalapad sa food production sites sa amihanan ug habagatang distrito lakip na ang South Road Properties (SRP).

Gipahibalo usab niya ang pagpalambo sa irigasyon, water infrastructure alang sa Busay NHA Housing ug Barangay Guba, ingon man ang Forest Park Adoption Partnerships.

Sa 256K Tree Growing Project nakaabot na sa 126,300 ka kahoy ang natanom sukad pa niadtong 2025.

Aron matubag ang problema sa basura gilusad ang Eco-Station sa SRP ug ipadayon ang Waste-to-Road Project diin gamiton ang recycled bottles alang sa pag-aspalto sa mga kadalanan sa siyudad.

Pahugtan usab ang pagpatuman sa Solid Waste Management pinaagi sa kampaniya nga "Basura Mo, Kaugmaon Nato”.

Padayon usab ang dredging, drainage interventions, pag-declog sa mga kanal ug sapa aron malikayan ang pagbaha.

Ang administrasyon ni Archival nagplano sa pagpatuman sa No Contact Apprehension Policy, E-Traffic Citation Tickets pinaagi sa MICS ug CCTO, magbutang og Ayala Terminal–Quest Hotel Sky Bridge, pedestrianization sa mga dalan, traffic route adjustments pinaagi sa Metro Cebu Expressway, Ban-Tal ug CCLEX, pagtangtang sa spaghetti wires ug pagpatuman og underground line distribution sa mga linya sa kuryente.

Gilakbit usab sa mayor ang pagpalig-on sa disaster preparedness pinaagi sa Unified Command Center, earthquake response systems ug pagdirekta sa Office of the Building Official (OBO) aron susihon ang earthquake fault lines.

Sa pagpaplig-on sa kita sa siyudad, ipatuman ang digitalization sa business permits, Night Market Ordinance ug pagpalambo sa sports ug events destination aron mapalambo ang turismo.

Sa sektor sa panglawas, ipatuman ang Smart Healthcare ug ang pagkompleto sa Cebu City Medical Center (CCMC) lakip usab ang mga programa sa paghatag og libreng dialysis services ug dugang seminar sa barangay health workers.

Lakip usab sa gihisgotang ni Archival ang pagpatuman sa social programs lakip niin ang pag-rescue sa street dwellers, Walang Gutom Project ug kapasilungan sa mga libudsuroy ug uban pa. BDB BANAT NEWS