Gilas sasagupa sa Finland, Estonia sa pocket tourney
MANILA, Philippines — Nakalatag na ang bigating training camp ng Gilas Pilipinas sa Europe sa Hunyo bilang preparasyon sa 2023 FIBA World Cup sa Agosto dito sa bansa.
Unang nakalinya sa Gilas ang biyahe sa Estonia para sa isang pocket tournament na tampok din ang Finland national team bilang sariling paghahanda nito sa World Cup.
Nasa Group A ang Gilas kasama ang Italy, Angola at Dominican Republic na sasalang sa Smart Araneta Coliseum habang nasa Group E ang co-host na Japan, Australia at Germany at maglalaro sa Okinawa.
Sasabak din sa training ang Gilas sa Lithuania at Latvia, ayon kay head coach at program director Chot Reyes sa panayam sa “Power and Play” program kahapon.
Hindi makakalaban ng Gilas ang Lithuania national team na saktong unavailable para sa World Cup preparations din nila pero mapapalaban sa top clubs ng Lithuania at Latvia.
Sa Europe rin nagdaos ng training camp ang Gilas noong 2014 para sa Spain World Cup na nagresulta sa magandang kampanya bagama’t hindi nakapasok sa second round.
Pagkatapos ng biyahe sa Europe ay maglalaro rin ang Gilas sa isang pocket tournament sa China bago umuwi para ipanalisa ang preparasyon.
Kagagaling lang ng Gilas sa matagumpay na pagbawi ng gintong medalya sa 32nd Southeast Asian Games sa Cambodia.
Patikim pa lang iyon dahil mas malaking hamon ang naghihintay sa Gilas sa World Cup sa Agosto 25 hanggang Setyembre 10.
- Latest