Marami-rami na ring ulit nasilayan
Ang kaakit-akit na Mount Fuji ng Japan!
May ‘di sinasadya’t may sadyang pinuntahan,
Ngunit iba nitong huli’t pinaghandaan!
Ang ibig sabihin todo na ‘to! Ichiban!
Espesyal kumbaga’t para sa Fuji lamang!
‘Yun bang sa apat na araw s’ya lang titingnan
Pagkat kinuhang hotel S’YA NASA HARAPAN!
At nakadagdag pa sa kanyang kagandahan,
Ang Lake Kawaguchiko ay nakapagitan!
At para THE BEST na, sinagad pa ang yabang —
BALKONAHE NAMIN MAY ONSEN SA HARAPAN!
Nilakbay namin mga dalawang oras pa
Paglapag mula sa Paliparang Haneda,
Malayo sa syudad at nasa probinsya na
Ang mamahaling hotel — KOZANTEI UBUYA!
At pagdating doon ang ngiti naming lima
Ay bigay na bigay at abot hanggang tenga!
Si Jocas, Jako, Jio at aking asawa,
Op kors Ang Poet N’yo ang liksi parang ninja!
S’yempre ang saya at punong-puno ng gana!
Pasado Alas Kwatro oras sa kanila,
Bago pa mag-check in dinako muna mata
Sa gawi ng Mount Fuji naturalmente pa!
Ngek! SUSHI-maryosep! Tempura naman! Nganga!
Eh halos hindi makita si Fujiyama!
Medyo may konting tuktok pa na natitira
Sa kapal ng ulap… biglang nanghina ninja!
Pero dapat ‘di mawawalan ng pag-asa,
Wika nga ‘wag daramdamin at may bukas pa,
Pag nahawi ang ulap at langit bughaw na,
Ang bundok na bulkan din t’yak na makikita!
Subalit nang dumating ang bagong umaga
At kami ay nasa araw na pangalawa,
Wala pa rin ang Mount Fuji na ipinunta!
Hiling na nga… KAHIT MAYON MAGPAKITA NA!
Relaks lang at may pag-asa pang natitira,
Pero nung ikatlong araw biglang ulan pa!
Ngek! Lalong nangulimlim! Nag-sex change na ninja…
Nagpalit din ng pangalan… s’ya ay JANIN na!
Wala na! Suko na! Hanggang dun lang talaga
Pagkat kinabukasan kami’y uuwi na!
Nang biglang manumbalik sa’king alaala —
Iceland, Finland and Sweden nang kami’y magpunta!
Tiniis ang halos 40 below zero ba
Dahil paghabol at pag-abang kay Aurora!
O Aurora Borealis na napakaganda,
O eh di nakita ka ri’t nanginginig pa!
Nanginig sa lamig subalit nagkabunga!
At ‘yan ang nagbigay ng konti pang pasensya,
Sa matyaga walang matimtimang Aurora!
Mas tunay pa — habang may buhay may pag-asa!
At nung huling araw nagising nang maaga,
Alas Dyes ang sundo pabalik ng Haneda,
Sinimulan ko na rin na mag-empake na,
Pagtingin sa relos Alas Kwatro lang pala!
Ngek! Eh bakit ganon ang liwa-liwanag na?!
Ulap halos nasa lawa… LA-WA na sila!
Batik-batik na asul na ang makikita!
Na-“confirmed” nang ninja naging “may chance”… maganda!
Tuloy pag-beauty pero bruhang Fuji wis pa!
Ako ay naligo at nagkape na muna,
At bandang Alas Syete ‘di kaGinza-Ginza
Este, kaginsa-ginsa pala… AYAN NA S’YA!
Basta apir lang nang bigla na bonggang-bongga!
With puting korona! Ice cream on top ang drama!
Ang mahilig sa taguan… Queen Fujiyama!
Kahit 30-minute audience nga lang pwede na!
Pero TATLONG ORAS din kaming nagpasasa!
Mamangha sa The Most Beautiful Haponesa!
At dun sa mga may kahirapang makita,
Makikita n’yo pag ‘di kayo nagpakita!