Gatchalian, Libanan nanawagan sa pagpaubos sa presyo sa kuryente

CEBU, Philippines — Nanawagan si Senate President Sherwin Gatchalian ug House Minority Leader ug 4Ps Party-list Rep. Marcelino “Nonoy” Libanan og mga lakang aron mahimong mas barato ug mas accessible ang elektrisidad alang sa mga konsumidor sa Pilipinas.

Gidasig ni Gatchalian ang National Electrification Administration (NEA) nga makompleto ang rural electrification program sa gobyerno hangtod sa 2028, tungod kay hapit tulo ka milyon ka panimalay sa Pilipinas ang wala pay elektrisidad niadtong Hunyo sa niaging tuig.

Matud ni Gatchalian, kinahanglan nga dunganon ang universal access sa kasaligan nga elektrisidad ug ang mga paningkamot sa pagpaubos sa gasto sa kuryente.

Anaa karong tuiga ang P13.16 bilyon nga pondo alang sa NEA, lakip ang P9.342 bilyon alang sa National Rural Electrification Program ug P2.6 bilyon nga pautang alang sa mga electric cooperative.

Si Libanan miingon nga mahimong makabenepisyo ang mga konsumidor sa Visayas sa mas ubos nga electricity rates ug posibleng refund human gisuspenso sa Energy Regulatory Commission (ERC) ang sobra nga Line Loss and Congestion Cost (LLCC) charges.

Matud niya, misaka og P2 hangtod P5.99 kada kilowatt-hour ang bayranan sa kuryente sa pipila ka konsumidor tungod sa sayop nga pagpas-an sa maong charges. Ang sobra nga LLCC charges sa Eastern Visayas gibanabanang miabot sa P1.55 bilyon sukad Enero.

Gimanduan usab sa ERC ang Independent Electricity Market Operator of the Philippines nga suspensohon ang apektadong Line Rental Trading Amounts, tul-iron ang pricing methodology ug ipahigayon ang independent audit nga magsugod balik sa Hunyo 26, 2021.

Matud ni Libanan, ang maong review mahimong mosangpot sa refund alang sa mga konsumidor nga sobra og singil, diin ang mga adjustment mahimong bahinon sa daghang billing periods. — /MEL (BANAT NEWS)