Alab Pilipinas dako’g purohan moabante sa ABL finals

CEBU, Philippines — Dako kaayo og purohan nga matuman sa Alab Pilipinas ang ilang bahad pagharos sa bisitang Hong Kong  Eastern Lions sa ilang pag-host sa Game-2 sa ‘best-of-three’ semifinals series sa ASEAN Basketball League karong adlawa didto sa Laguna.

Ang Alab nga gitagak sa Eastern Lions sa miaging tuig laraw nga  tiwasan ang Hong Kong human nila masakmit ang daog sa Game-1 sa ilang pagpanulong didto sa Hong Kong niadtong miaging semana.

Si Alab coach Jimmy Alapag nagkanayon nga nagpanikad na iyang mga batos sa maong duwa karon ilabi na iyang leading local scorer nga si Ray Parks Jr. nga wala kaduwa sa miaging tuig tungod sa injury.

Ning higayona, si Parks himsog nga moduwa uban sa import tandem nila ni Justin Brownlee ug Renaldo Balkman. Si Balkman maoy numero unong labad sa ulo sa Eastern Lions human sa iyang tournament-high 46 puntos sa Game 1.

Si Balkman nangandam sa mas hugot nga depensa batok kaniya karon, apan salig siya nga dili lang siya ang mobida karon aron hingpit na nilang madispatsar ang Eastern Lions.

Ang defending champion nga Hong Kong magsalig nila ni Tyler Lamb, Marcus Elliot ug Fil-German Christian Standhardinger.