Warriors gipakauwawan sa Jazz
CEBU, Philippines — Gipakauwawan sa Utah Jazz ang defending champion Golden State Warriors pinaagi sa paglubong, 119-79 sa nagkainit nga aksiyon sa National Basketball Association kagahapon didto sa Vivint Smart Home Arena sa Salt Lake City, Uta
Usa sa mga lig-ong kandidato alang sa “Rookie of the Year” nga si Donovan Mitchell mihimo og team-high 22 puntos. Usa usab ka rekord iyang natala human siya mitali sa iyang ika-186 nga three-point shots nga maoy labing daghan nga nahimo sa usa ka rookie sud sa usa ka season.
Sa maong kadaogan ang Jazz misaka sa ikatulong dapit ug nakigtabla uban sa Portland TrailBlazers sa managsamang baraha, 48-33. Ang Warriors segurado na sa No. 2 sa ilang 58-24 record.
Wala hinuon makaduwa si Stephen Curry tungod sa injury nga nakapahinay sa ataki sa Warriors.
Si Klay Thompson mihimo og 23 puntos alang sa Warriors, samtang si Kevin Durant igo lang mipugnit og 13 puntos.
Didto sa Atlanta, ang nanulong nga Philadelphia 76ers mikulit sa ika-15 nilang sunod-sunod nga daog ug hapit na mokandado sa ikatulong dapit sa Eastern Conference.
Si JJ Redick mitira og 28 puntos, samtang ang star point guard nga si Ben Simmons mirehistro og double-double nga 14 points ug 10 rebounds.
Balanse nga ataki ang gihimo sa Sixers diin si Ersan Ilyasova mihimo og 26 ug si Marco Belinelli adunay 20 puntos.
Sa ubang mga resulta, ang Washington Wizards mibihag sa Boston Celtics, 113-101, ang Houston Rockets mipilde sa Los Angeles Lakers, 105-99, ang Charlotte Hornets mipakaging sa Indiana Pacers, 119-93 ug ang Phoenix Suns mipakaging sa Dallas Mavericks, 124-97.
- Latest
