Bangkay ng 2 bebot natagpuan sa plantasyon

KIDAPAWAN CITY  , Philippines  — Naaagnas na ang katawan ng dalawang babae na natagpuan sa masukal na bahagi ng isang plantasyon ng tubo sa Sitio Ka­yakaya, Brgy. Marbel, Matalam, North Cotabato. Sa ulat ni P/Chief Insp. Sunny Rubas Leoncito, hepe ng Matalam Police, nakatanggap siya ng tawag mula kay Kapitan Roxas Balacanan na may natagpuang bangkay ng dalawang babae sa plantasyon ng tubo dakong alas-6:30 kamakalawa ng umaga.

Ang nasabing plantasyon ay pagmamay-ari ni Laga Unsil Tagitican. Agad namang tinungo ni P/Sr. Insp. Mautin Pulua Pangandigan, ang deputy chief of police ng Matalam Police kasama ang SOCO Kidapawan kung saan narekober sa isinagawang imbestigasiyon sa crime scene ang isang piraso ng tsinelas na kulay lavender, isang pony tail, mga gamit pambabae at maong pants.