Pambansang kamao

Ang pitak na ito’y hindi nagsasawa

Pambansang kamao purihin sa tula;

Pagka’t sa totoo siya lang talaga

ang dapat hangaan nitong buong bansa!

Mahusay sa boksing palaging panalo

kaya kinilalang bayani’t idolo;

At dahil sa galing naging bilyonaryo

sa dami ng pera ay walang tatalo!

Sa dami ng kanyang tinamong tagumpay

sari-saring award ang kanyang nakamtan;

Binigyan ng ranggo sa hukbong katihan

at saka siya rin ngayon ay congressman!

Sa mga naroon sa ating Kongreso

pinakamalaki ang perang natamo;

Pera nang bilangin malaki pa ito

sa pera ni Marcos at Villar ng Senado!

Sa nangyaring ito sabi nang marami

ay hindi basketball haraping mabuti;

Dapat ang harapin niya magtayong malaki

ng boxing stadium tulad ng Elorde!

Bakit kaya bakit Pambansang kamao

nagbago ng hakbang sa panahong ito?

Alam nating lahat siya’y boksingero

ay bakit basketball ang pinasok nito?

Sabi nang marami nating kababayan

palibhasa’y bantog sumobra ang yabang;

Ngayon ay head coach na ng isang larangang

Malayung-malayo sa kanyang minulan!

Marami na siyang tahanan at mansion

dapat magpatayo ng boxing stadium;

Mga boxer nating naghihirap ngayon

doo’y magsasanay para rin magkampeon!

Mungkahi ng pitak saka ng iba pa

sa halip basketball ang harapin niya;

Dahil bilyonaryo at maraming pera

kapwa boksingero ang tulungan sana!