Lola nag-panic, tumalon sa jeep, dedo

MANILA, Philippines - Naging mitsa ng kamatayan ng isang 69-anyos na lola ang kanyang pagpa-panic kaya tumalon ito sa jeepney at mabagok ang ulo sa espaltadong kalsada sa Brgy. Bergado, Mutia, Zamboanga del Norte kamakalawa.

Idineklarang dead on arrival sa ospital ang biktimang si Erlinda Malmis  ng Concepcion, Misamis Occidental bunsod ng head trauma.

Sa ulat ng pulisya,  naganap ang insidente dakong alas 7:50 ng umaga habang binabagtas ng sinasakyan nitong jeep (JVL-472) ang highway ng Brgy. Bergado, Mutia, Zamboanga del Norte.

Pababa umano ang nasabing highway nang big­lang ianunsiyo ng driver na nagloloko ang makina ng behikulo. Sa sobrang takot ay mabilis na tumalon ang biktima sa bintana ng jeep at humampas ang ulo sa kalsada.

Samantalang sa kabila ng nagloko ang makina ng behikulo ay wala namang nangyaring masama sa iba pa nitong pasahero.

Isinailalim na sa kustodya ng pulisya ang kawawang driver at ini-impound rin ang behikulo nito kaugnay ng kasong kriminal sa pagkamatay ng matanda.