Polis gibirahan patay

CEBU, Philippines - Gipusil patay sa duha ka mga lalaking nagsakay og motorsiklo ang usa ka polis nga padulong motrabaho samtang nag-atang kini og bus padulong sa Cebu City sa barangay Poblacion sa alas 8:00 sa miaging gabii.

Ang maong polis naila nga si PO1 Felicisimo Unabia, sakop sa Mobile Patrol Group sa  Cebu City Police Office, apan molupyo sa Poblacion sa dakbayan sa Carcar. Matud pa nga bag-o lang gyud nakalabay ang patrolcar sa kapolisan sa dakbayan sa Carcar dihang nahitabo ang pagpamusil.

“Pila ra gyud ka minuto nga nakarating ang patrolcar sa station nang may marinig na putok ng baril,” matud ni Supt. Ricky Delilis, ang hepe sa Carcar City Police station dihang nahinabi sa The Freeman/Banat News.

Matud pa nga duha ka mga lalaki ang kalit mihunong sa tungod ni Unabia ug mipabuto sa ilang armas pipila ka higayon ug kalit nga mipasirit og dagan  padulong sitio Luwan-Luwan sa samang barangay.

Napalgan na lang si Unabia nga nagbuy-od sa dalan nga may samad pinusilan sa iyang lawas ug dali kining gidala ngadto sa Carcar Provincial Hospital apan gideklarar na kini nga dead on arrival. Duha ka mga lalaki nga sila si Marvin Binoya, sa Barangay Poblacion 3 ug si Juanito Linggatong, sa Barangay Poblacion ang giimbestigar tungod sa pagdudang sila maoy mipusil sa biktima.

Ang duha positibong giila ni Eddie Unabia, ang maguwang sa biktima, base sa close-circuit television (CCTV) camera footages sa maong hitabo.

Ang hepe sa Cebu Provincial Police Office, Sr. Supt. Noel Gillamac miingon nga posibling dumot ang hinungdan sa maong krimin.

“Ang igsuon aning biktima na-involve og patay pero walay na-file nga kaso possible revenge sa mga nabiktima ato pud tan-awon kung ang iyang pagka-pulis (ang motibo),” matud pa ni Gillamac.

Samtang giparelibohan dayon ni Gillamac si Delilis tungod sa giingong kapakyas niini pagsulbad sa mga krimen sa maong siyudad sulod sa nakalabay’ng tulo ka bulan.

Gawas nga relibohan sa iyang katungdanan si Delilis ipaubos pa gyud kini sa pre-charge evaluation aron masuta kung wala ba kini magpasagad sa iyang katungdanan.

Si Gillamac miingon nga si Delilis nahimong hepe sa Carcar sukad pa niadtong Enero niining tuiga. Ibalhin siya karon sa Provincial Operation and Plans Branch sa CPPO. Samtang ang mohulip kang Delilis isip OIC sa Carcar mao si police Chief Insp. Tedolfo Manatad.  (BANAT NEWS)