Wala ko na usab matuyo niining taknaa
Ako nalang namatngunan gahanduraw pwerteng layua
Mga panglantaw kong lapus bungbong tungod sa hait nga tutok
Kay sulod niining dughan mga kasakit nga kaagi gatampusisok...
Gusto ko mang pugngan ug kadtong tanan hikalimtan
Apan kanunay’ng magduwa-duwa sa akong alimpatakan
Bisan pag guruyon aron ang ugma ug ang kasamtangan maoy buligan
Mulingyo pa gihapon mao’ng kanunay’ng paghinuktok maoy magahinan...
Pipila na ka lusok sa luha ang nangagas niining mga mata
Sa bugnaw nga panahon ug sa akong lawak mag-inusara
Ilabi na gayud kong tugtugon sa radio ang awit sa gugma
Daw mubuto kining dughan kong kanimo nangandoy’ng makauban ka...
Kutob nalang gayud ako sa paggakos sa akong unlan sa hugot
Aron mabati ko ang nagdilaab nga kainit punay kong ginaaghop
Bisan pa man kining buluhaton sa akong pangagpas di makahimuot
Apan ako nalang isipon kay sa pagsamot sa akong pagbating kaligugot...
Dili ko man unta naandang muambak sa lapukong ganghaan
Apan sa akong kahangangha habulang sundang ra’y nahimong hinagiban
Natiklaob ug nabwasot apan walay igong kusog nga ikasakbang
Mao nga sa susamang kaang sa kagahapon subli kong gipuy-an...