Upat ka eskuylahan gipadad-an og hulga

CEBU, Philippines — Gisuspenso ang klase sa University of Cebu (UC)-Banilad niadtong Martes, Agosto 4, human makadawat og hulga pinaagi sa Facebook Messenger ang usa ka faculty member, nga maoy hinungdan sa pag-evacuate sa mga estudyante ug pag-inspeksyon sa campus sa kapolisan.

Sumala sa Mabolo Police Station sa Cebu City Police Office (CCPO), nadawat sa faculty member sa Senior High School building sa UC-Banilad sa Barangay Banilad ang maong mensahe mga alas 10:30 sa buntag gikan sa Facebook account nga naggamit sa ngalan nga “John Dave.”

Ang mensahe nag-ingon, “Amping mo ugma mga UCB Ma’am, samot mga morning kay anam-anamon mo namo. Condolences daan ninyo, hihihi.”

Human madawat ang report, mitubag dayun ang Mabolo Police Station pinangulohan ni Police Major Thom Ed  Taghoy kauban ang mga sakop sa Special Weapons and Tactics (SWAT) team ug Mobile Patrol Unit (MPU).

Mitabang usab ang Cebu City Disaster Risk Reduction and Management Office (CCDRRMO) ug mga volunteer firefighters sa paghimog inspeksyon sa mga classroom ug ubang pasilidad sa unibersidad.

Samtang nagpadayon ang inspeksyon, gipagawas ang mga estudyante sa campus  ug gisuspenso ang klase mga alas 11 sa buntag.

Walay nakitang eksplosibo o bisan unsang timailhan sa hulga human sa ilang inspeksyon ug security assessment sa eskwelahan.

Padayon karon ang imbestigasyon sa kapolisan aron mailhan ang nagpadala sa mensahe  alang sa pagpasaka og kaso.

Gihangyo usab sa CCPO ang publiko nga magpabiling kalmado ug likayan ang pagpakaylap og mga dili beripikadong impormasyon.

Sa pikas bahin, gipalig-on sa Department of Education (DepEd) Mandaue City Division ang mga lakang sa seguridad sa tulo ka pampublikong eskwelahan human sad sila nakadawat og mga hulga nga mikaylap sa social media.

Matud ni DepEd Mandaue Division Legal Officer Atty. Marinel Oro,  nagpatabang sila Mandaue City Police Office (MCPO)  pagkadawat nila sa hulga.

Niadtong Lunes, Agosto 3, nagbutang og mga polis sa mga eskwelahang naapektuhan sa hulga. Nitabang sab ang mga barangay sa pagbantay sa seguridad.

Ang hulga nga nadawat gipakaylap pinaagi sa social media nag-ingon: “Nag hinay-hinay namig kakatag sa among team, naa nasad me pusilon. Amping nalang ninyo. Target: Grade 7 hangtod Grade 12. Good luck ninyo haha.”

Bisan sa maong hulga, wala gisuspenso ang klase basi sa desisyon DepEd ug sa PNP human nila nasutang dili ni tinuod. Gisubay na sa kapolisan kun kinsa ang nagpadala ug nag-share sa maong hulga. –  Kristin De Dios/IBM BANAT NEWS