Duha patay, tulo angol sa mga aksidente sa dalan

CEBU, Philippines — Duha ka tawo ang namatay samtang tulo ang naangol sa tulo ka magkalain-laing aksidente sa kalsada nga nahitabo sa Cebu ug Bohol niadtong Agosto 3 ug 4.

Sa Bogo City, Cebu, duha ka drayber ang naangol human magsunod-sunod ang bangga sa upat ka aluminum van trucks sa National Highway sa Barangay Cogon alas-6:05 sa buntag sa Agosto 4.

Base sa imbestigasyon sa Bogo City Police Station, naglaray ang upat ka trak padulong sa Mandaue City ug mihunong tungod sa pula nga suga sa traffic light.

 Apan ang ikaupat nga trak kalit nga mibangga sa ikatulong trak, nga natulod usab ngadto sa duha pa ka trak sa atubangan.

Matud sa drayber sa ikaupat nga trak, niingon nga nasuwaw daw siya sa kusog sa adlaw maong wala niya malikayi ang mga sakyanan sa iyang atubangan.

Naangol ang duha ka drayber ug gidala sa Cebu Provincial Hospital sa Bogo City samtang ang upat ka trak nakaangkon og kadaot.

Sa Consolacion, Cebu, usa ka 25-anyos nga drayber ang namatay human nahulog sa pangpang ang iyang gimanehong Isuzu mini dump garbage truck sa Barangay Panoypoy niadtong Agosto 3.

Giila ang biktima nga si Kith Ivan Almeres Monte, residente sa Barangay Mulao, Compostela. 

Sumala sa imbestigasyon, nikagar ang brakes sa trak samtang nagpadulong kini sa Barangay Binaliw, Cebu City.

Nawad-an og kontrol sa manibela ang trak ug nahulog sa pangpang. Gideklarar siyang patay sa doktor tungod sa traumatic cerebral hemorrhage.

 Ang iyang kauban nga si Gerald Jayme, 21, nakaangkon usab og mga samad ug padayon nga gitambalan sa ospital.

Sa Panglao, Bohol, namatay usab ang usa ka 87-anyos nga motorista human mabanggaan sa laing motorsiklo sa National Highway sa Purok 5, Barangay Tangnan, alas-8:30 sa buntag sa Agosto 3.

Sa imbestigasyon sa Panglao Municipal Police Station, kalit nga mi U-turn ang motorsiklong gimaneho ni Federico Cloma Bunao, hinungdan nga wala na makalikay ang motorsiklong gimaneho sa usa ka 27-anyos nga babaye ug mibangga niini.

 Tungod sa kusog sa impact, natumba ang duha ka motorista ug naangol ang mga riders, gidala ang duha sa Gov. Celestino Gallares Memorial Medical Center sa Tagbilaran City apan gideklarar nga dead on arrival si Bunao.

Tambag sa  kapulisan ang ilang pahimangno sa tanang motorista nga mag-amping sa pagmamaneho, sigurohon nga maayong kondisyon ang ilang mga sakyanan, ug sundon ang mga balaod sa trapiko aron malikayan ang susamang mga aksidente.—  IBM BANAT NEWS