Yasmien loyal sa GMA

CEBU, Philippines - Mi-renew si Yasmien Kurdi sa iyang kontrata sa GMA-7 dili pa lang dugay.  Nagpabiling loyal si Yasmien sa iyang mother network gumikan kay dinhi siya nagsugod sukad siya niapil kaniadto sa StarStruck. Mapasalamaton si Yasmien sa GMA-7 gumikan kay wala gyud pasagdi ang iyang career.

Saad ni Aljur

Masaligon si Aljur Abrenica nga madawat ra siya ni Robin Padilla, ang amahan sa girlfriend niya nga si Kylie.   Gipasalig ni Aljur nga atimanon ug higugmaon niya si Kylie sa tibuok niyang kinabuhi. Wala pa’y tataw nga petsa sa ilang kasal.

Wala’y forever

Nagpabiling tak-om sila si Ruru Madrid ug Gabbi Garcia sa taho nga matud pa gitak-opan na nila ang ilang relasyon sa miaging buwan.  Giingong prayoridad sa duha ang tagsa-tagsa nila nga mga career.

Mark duna’y kaaway?

Aduna’y gipadungog-dungog si Mark Herras sa iyang social media post . Matud pa nga duna’y tawo nga gustong moguba sa relasyon nila ni Winwyn Marquez.  “My panggaaa is back! Thank you Lord. If someone wants to ruin our relationship I’ll kill you!!!”, suma pa ni Mark.

Puli og bantay

Plantsado na ang tanan alang sa pagbalik ni Marian Rivera sa paggama og serye. Naatol usab kini nga naghinapos na ang serye sa iyang bana nga si Dingdong Dantes nga Alyas Robinhood busa duna ra’y makapuli og monitor sa anak nila nga si Zia. Giingong ibutang sa afternoon slot ang serye ni Marian.

Kevz sa musical play

Dili interesado si Angeline Quinto  nga mosalmot og mga musical play sa laing nasud gumikan kay dali ra kaayo siya ma-homesick.  Matud pa ni Angeline nga dili gyud siya magsilbi og istar og dugay sa laing nasud.

Vice mitubag

Gitubag ni Vice Ganda ang  obserbasyon sa iyang kritiko  nga matud pa nga  bad influence siya sa child star nga si Awra Briguela. "Wala kasing edad 'yon. Walang tamang edad kung kailan ka dapat magbakla. Walang tamang edad kung kailan ka dapat puwede nang magbakla," suma  pa ni Vice.

Tambag ni Shamcey

Gitambagan ni  Miss Universe 2011  third runner up  Shamcey Supsup ang pambato sa Pilipinas nga si Maxine Medina nga dili magpadala sa  mga lenggua sa bashers . Matud pa ni Shamcey nga ang  mga positibong  mensahe  sa mga tawo maoy angayan nga paminawon ni Shamcey ug deadmahon ang mga wala’y ayo nga pulong.

Pelikula ang tirada

Ang  pagkalakip sa mga pelikula sa Viva Films  maoy gikabisihan karon ni Meg Imperial.  Usa sa iyang gi-promote karon  mao ang pelikulang Swipe nga naghisgot sa mga tawo nga nangita og partner pinaagi sa online dating application.  Naa pa’y mga umaabot nga pelikula si Meg sa Viva.

Xian idugang

Gipaabot nga musulod si  Xian Lim sa seryeng  "A Love to Last" nga gibidahan nila ni  Ian Veneracion, Iza Calzado ug  Bea Alonzo.   Katapusang serye ni Xian mao ang "The Story of Us" sa miaging tuig diin  kauban niya ang  iyang on-screen partner nga si  Kim Chiu.

Bug-at nga eksena

Nahimong trending niadtong Huwebes sa gabi  pagpagawas sa tibuok trailer sa bag-ong serye ni Maja Salvador sa ABS-CBN nga Wildflower.

Nakita  ang hugyaw nga pag-arte ni  Maja sa pipila ka mga eksena busa   pipila ka netizens ang nipadayag nga naghinam-hinam na sila sa maong serye.  Matud pa nga nagbaha ang mga bug-at nga eksena sa maong serye busa nasukod og samot ang abilidad ni Maja.

Nalakip usab sa Wildflower sila si  Wendell Ramos, Aiko Melendez, Tirso Cruz III ug Joseph Marco. (BANAT NEWS)