Propaganda lang

Dako pa kaayo og hawan ang alimpatakan sa katawhan nga masudlan og mga bag-ong kasayoran sa nagpadayon nga impeachment trial batok kang Bise Presidente Sara Duterte Carpio tungod kay ang atong mga nadungog sa una ug ikaduha nga adlaw balik nalang sa una na natong nadunggan. Sama sa pagkontrata ni Bise Presidente Sara Duterte og mopatay nila ni Presidente Bongbong Marcos (PBBM), Liza Marcos (LAM) ug Martin Romualdez (MR). Una napod nato nga nadunggan ang pasangil nga pagwaldas sa confidential ug intelligence fund sa bise Presidente.

Ang gusto nako nga ipresentar sa prosecution mao ang tawo nga gikontrata ni Bise Presidente Sara Duterte sa pagpatay ni PBBM, LAM ug MR. Ambot og mao ba pod ni ang gusto ninyo? Kay kun dili makapresentar niini ang prosecution, then, walay krimen. Absuwelto niini ang Bise Presidente ug ang presentasyon ani sa prosecution makonsiderar lamang nato propaganda batok sa Bise Presidente nga mipabor hinoon ngadto kaniya.

Hinumdumi nga dili tanan mogawas sa atong baba awtomatiko nga mahimong krimen. Kun ang pagtawag nimo sa usa ka tawo nga kawatan o unsa nga matang sa pagpakauwaw bisan pa og tinuod kini, krimen, ang pagtug-an ni VP Sara nga nagkontrata na siya og mopatay ni PBBM, LAM ug MR kun patyon siya, dili. Hambog ra niya kini ug bunga lang sa iyang emotion.

Ibutang nato nga dili hambog ang migawas sa baba ni VP Sara ug tinuod nga nagkontrata na gyod siya og mopatay, ang kontrata nga iyang gisudlan bisan unsa pa kini ka illegal dili kini mahimong krimen kay ang kontrata kaso nga civil ug dili kriminal. Mahimo lamang kining krimen kun gipatuman na ang gisabotan nga kontrata sa pagpatay. Apan dakong buhi sila si VP Sara, PBBM, LAM ug MR busa walay consumation sa kontrata.

Iprobar sa prosecution nga nag-hire si VP Sara og assasin? Unsaon man nila kini sa pagprobar? Ilang ipresentar ang gi-hire nga assasin? Nakaila diay sila niini? Dili pod puwede nga si VP Sara ang mopresentar sa assasin nga gi-hire niya kay sa husgado, ang namasangil mao man ang moprobar.

Sa laktod, walay ebidensiya ang prosecution. Kutob ra sila sa propaganda batok sa bise presidente nga ang prosecution hinuon ang naalkanse.