Maniobra sa pagsaag
Nakalahi sa impeachment trial sa Senado gikan sa husay sa ubang mga kaso sa korte mao nga politikanhon ang proseso: Pulos mga politiko ang mga huwes; ang opinyon sa publiko maka-impluwensiya sa ilang baruganan; ug ang tumong mao ang pagsusi sa kahaom sa sinumbong sa pagpabilin sa puwesto.
Mao nga ang bugtong silot nga mapahamtang batok ni Bise Presidente Sara Duterte kon makonbikto sa nagpadayong impeachment trial mao ang pagkatangtang sa katungdanan ug pagdili niya sa paghupot (pinaagi sa pagpapili sa eleksiyon o pagkatudlo) og bisan unsang puwesto sa gobiyerno.
* * *
Mao kini ang rason nganong mas luag ang mga lagda. Mahimong gamiton ang rules of court ug rules of evidence pero aron lang sa pagpahapsay sa proseso. Dili sa paghigot sa husay sa walay kinutoban nga mga lalis sa procedures ug technicalities.
Ang impeachment trial angayng mohatag sa prosekusyon sa tanang kahigayonan pagpresentar sa ilang mga ebidensiya ug mga testigo pagmatuod sa mga pasangil batok ni VP Sara. Ug paghatag sab ni VP sa samang kahigayonan pagpresentar og mga ebidensiya ug mga testigo aron sa pagpanalipod sa iyang kaugalingon.
* * *
Dili maayong mga timaan sa unang mga adlaw sa impeachment trial mao ang mas dakong panahon ang nausik sa debate dili lang sa mga abogado sa prosekusyon ug depensa kon dili apil na sa senator judges.
Apiki nang daan ang kalendaryo sa Senado (kay magsugod na og tuki sa 2027 budget sa sunod buwan), gikabalak-an nga mas nihit pa gyod ang mahibiling mga oras sa pagpakita sa mga ebidensiya ug pagpaminaw sa mga testimoniya.
* * *
Hinaot nga makakita og paagi ang senator judges, labi na silang Senate President Sherwin Gatchalian ug Presiding Officer Chiz Escudero, pagpaspas sa husay: Pinaagi sa pagmenos sa wala kinahanglana nga mga lalis; sa walay pagsakripisyo sa mga katungod sa prosekusyon ug sa sinumbong.
Makatabang ang prosekusyon pagsegurong dili masaag ang husay kon dili mosakay sa maniobra sa depensa sa paglangay, paglibog, paglipat ug paglawgaw. Ang pagpasaka og bag-ong petisyon nga nag-awhag sa Korte Suprema sa pagpahunong sa impeachment trial nagmatuod nga dili gyod ganahan si VP Sara nga maablihan ang bank accounts ug ubang mga ebidensiya nga makaguba niya.
* * *
- Latest
