Senador Go misaludo sa Cebu WDSF International Open

CEBU, Philippines — Gidayeg ni Senador Christopher “Bong” Go ang pagpahigayon sa PSC-PDSF Cebu World Dance Sport Federation International Open 2026 nga gipahigayon ning bag o lang sa Pacific Grand Ballroom sa Waterfront Cebu City Hotel and Casino.

Si Go, chairperson sa Senate Committee on Sports, miingon nga ang mga internasyonal nga kompetisyon naghatag sa mga Pilipinong atleta og kahigayonan nga makigkompetensiya, mapalambo ang ilang kahanas ug mapalig-on ang presensya sa Pilipinas sa internasyonal nga sports.

Gisuportahan sa Philippine Sports Commission (PSC) og P1 milyon ang pagpahigayon sa kompetisyon nga gitambongan sa mga Filipino ug international Dance Sport athletes.

Gidayeg ni Go ang PSC, Philippine Dance Sport Federation, Dance Sport Team Cebu International Inc. ug ang mga organizer sa paghatag og dugang mga plataporma alang sa mga atleta. Matud niya, ang sports dili lamang bahin sa medalya kondili makatabang usab sa pagdasig sa kabatan-onan nga mahimong aktibo, himsog, molikay sa droga ug makakat-on sa disiplina ug sportsmanship.

Gipadayag ni senador Go nga ang pagtinabangay sa mga ahensiya sa gobyerno, national sports associations, local organizers ug pribadong sektor importante kaayo aron mas daghan pang oportunidad ug suporta ang mahatag sa mga atleta. — /MEL (BANAT NEWS)