WGM Frayna kampeon sa Women’s Chess Invitational

MANILA, Philippines — Muling nagpasiklab si Woman Grandmaster Janelle Mae Frayna matapos magreyna sa Women’s Chess Invitational title noong Linggo ng gabi na nilaro sa Alicia Community Center sa Isabela.

Nakipaghatian ng puntos ang 30-anyos na si Frayna kay Woman FIDE Master Franchesca Largo sa 31 moves ng English Opening upang ilista ang undefeated 11.5 points mula sa 10 wins at tatlong tabla.

Dominado ni Frayna ang nasabing tournament na ipinatupad ang 14-player single round robin at may time format na 90 minutes plus 30 seconds increment kada tira.

Lumanding sa second place si WFM Shania Mae Mendoza na may siyam na puntos, tinalo niya sa last round si Francois Marie Magpily sa 37 sulungan ng Four Knights Game.

Nakopo ni Woman International Master Ruelle Canino ang third place sa nirehistrong walong puntos matapos makipagkasundo ng draw kay Kate Nicole Ordizo sa 25 moves ng isa pang English encounter.

Pangalawang national title na ni Frayna ngayong taon, siya ang nagkampeon sa National Championship and Olympiad qualifier na nilaro sa Malolos, Bulacan noong Pebrero at fifth overall.