2 ka sakyanan gibanggaan og tanker, doktor naangol

CEBU, Philippines — Nasamdan ang usa ka 41-anyos nga doktor human mabangga ang iyang sakyanan sa usa ka water tanker truck nga nakaigo sab og laing van niadtong Huwebes sa kaadlawon, Sept. 3, sa M.C. Briones St., Barangay Guizo, Mandaue City. Nahitabo ang insidente alas-4:50 sa kaadlawon atubangan sa Shell gas station duol sa Maguikay flyover. Gi-report kini sa kapulisan alas-5:25 sa buntag ug miabot ang responding personnel alas-5:27.

Giila sa kapulisan ang nasamdan nga drayber nga si Elisa Marie Navarro Lim, 41, residente sa Banilad, Cebu City.

Base sa inisyal nga imbestigasyon, nagpadulong sa amihanan sa M.C. Briones St. paingon sa Maguikay flyover ang sakyanan ni Lim ug ang Toyota commuter van nga gimaneho ni Joseph Maglasang Tolo, 37.

Naa sa unahan sa van ang sakyanan ni Lim ug pareho silang naa sa inner lane.  Samtang,nagpadulong sa habagatan ang Fuso water tanker nga gimaneho ni Rolando Yek Bayarcal, 45, sa ibabaw sa Maguikay flyover.

Pag-abot sa maong dapit, nabangga sa water tanker ang sakyanan ni Lim. Human sa unang bangga, mipadayon og dagan ang tanker ug nabanggaan usab ang van ni Tolo, sumala sa kapulisan. Nasamdan si Lim ug gidala dayon sa Visayan Community Hospital alang sa medikal nga pagtambal.

Naguba ang atubangang bahin sa Mitsubishi Mirage, ang front-left portion sa Fuso truck, ug ang wala nga bahin sa Toyota commuter van. Kasong reckless imprudence resulting in physical injury and damage to property ang ipasaka batok sa drayber sa water tanker samtang padayon pa ang imbestigasyon. (BANAT NEWS)