Kabahin ang Krus ingon nga mga tinun-an

Maayong balita

Kun ikaw gani ang giisip nga Mesiyas sa ato pa, pagaisipon ka nga gamhanan ug lig-on.

Mao tingali nga si Pedro ingon man tingali ang ubang mga tinun-an ang nahimong naeskandalo sa dihang si Jesus nga ilang magtutudlo ang naghisgot naman og kamatayon.

Mao ni ang hinungdan kun nganong si Pedro ang nidala kang Jesus ngadto sa halayo aron ingon: “Dili unta kini mahitabo kanimo Ginoo!” apan gibadlong siya ni Jesus: “Pahawa Satanas! Nagbabag ka Kanako kay ang imong hunahuna, hunahuna sa tawo ug dili sa Dios!”

Kasinatian

Nahimong prinsipyo sa kadaghanan karon nga kinahanglang dunay kusog, gahum ug kabtangan. Kinahanglan nga hayahay ang kinabuhi ug dili malisud. Tungod ning maong tinguha sa kahayahay mao nga daghan ang nangita og kahigayonan nga makalikay sa bisan unsang pag-antos. Buhaton ang tanan aron mamahimong mahayahay diha sa kinabuhi.

Daghan nato ang buot og hinanaling resulta bisan pa man kun dili moagi og husto nga proseso. Sa laktod, ang Krus gikahadlokan sa kadaghanan kay daghan man nato ang dili buot nga mag-antos bisan pa man kun sayod kita nga ang pagpas-an sa krus mao man ang gikinahanglan aron kita pagaisipon nga mga tinun-an ni Kristo Jesus.

Lihok

Karong semanaha, pagkat-on og mga ginagmay nga sakripisyo alang sa imong kaugalingong kaluwasan ug alang sa pagtabang  sa uban.

Sama pananglit sa pagpuasa og usa ka kan-anan (sama pananglit sa paniudto) aron ang budget nga alang nimo mahimong gamiton nimo aron pagtabang sa uban nga mas nagkinahanglan pa kay kanimo.

Pangamuyo

BUG-at man tuod ang Krus Ginoo, apan sayud kami nga kun wala pa ikaw modupa alang kanamo, wala unta kami matubos.

Salamat Ginoo ning maong kahigayonan ug unta imo kaming lig-onon aron sama kanimo mamahimo kaming magmanggihatagon sa among kaugalinon alang sa uban. ikaw nga buhi ug hari hangtud sa kahangturan. Amen.