PhilHealth-7 hugot ang pangandam sa DRG- based payment system
CEBU, Philippines — Gipakusgan sa Philippine Health Insurance Corp. (PhilHealth) Regional Office VII ang pagpangandam sa mga ospital sa Central Visayas alang sa pagbalhin ngadto sa Diagnosis-Related Groups (DRG)-based provider payment system ubos sa Universal Health Care (UHC) Act.
Kabahin sa maong transisyon ang pagpatuman sa Philippine Diagnosis-Related Groups (PHL-DRGs), usa ka bag-ong mekanismo sa pagbayad sa mga healthcare provider diin ang mga kaso sa pasyente klasipikado base sa diagnosis ug paggamit sa mga serbisyo ug resources sa ospital.
Gikinahanglan sa PhilHealth ang kompleto ug kasaligan nga clinical data pinaagi sa Claim Form 5 (CF5) aron masiguro ang tukmang klasipikasyon sa mga inpatient case ubos sa DRG system.
Ubos sa PhilHealth Advisory No. 2026-0036, mandatory na ang pagsumite sa CF5 alang sa mga pasyenteng na-discharge sugod Agosto 1, 2026. Ang mga claim nga walay balidong CF5 attachment dili na dawaton alang sa pagproseso.
Aron matabangan ang mga ospital sa pagsunod sa bag-ong requirement, nagpahigayon ang Health Care Delivery Management Division sa PhilHealth PRO VII og “Retooling on the Shadow Billing of Diagnosis-Related Groups (DRG)” niadtong Agosto 19, 2026, sa Golden Prince Hotel and Suites sa Cebu City.
Gitumong ang kalihokan sa Level 2 ug Level 3 hospitals nga importante nga tinubdan sa inpatient claims data nga gikinahanglan alang sa hingpit nga pagpatuman sa DRG system.
Gipunting sa retooling ang shadow billing, usa ka transitional mechanism diin makahimo ang mga healthcare provider og simulated DRG claims samtang nagpadayon ang kasamtangang All Case Rates claims.
Ang maong orientation kabahin sa serye sa technical discussions nga gihimo sa PhilHealth alang sa mga government hospital, private health facility ug infirmary sa Central Visayas.
Ubos sa pagpangulo ni Acting Regional Vice President Jenet Ann Advincula, mipasalig ang PhilHealth-7 nga magpadayon sa paghatag og policy guidance, technical assistance ug operational support sa mga health facility isip pagpangandam sa nationwide transition ubos sa Universal Health Care program. (BANAT NEWS)
- Latest
