Angara: Online classes, hindi option

Sa pangamba ng mga magulang

MANILA, Philippines — Aminado si Department of Education (DepEd) Secretary Sonny Angara na ang paglipat sa online classes ay hindi isang ‘readily ­available option’ para sa maraming estudyante sa bansa.

Ginawa ni Angara ang pahayag matapos matanong sa isang ambush interview kung maaari bang ­piliin na lamang ng mga nag-aalalang mga magulang na mag-online classes na lang ang mga kanilang mga anak upang matiyak ang kaligtasan ng mga ito.

Ayon kay Angara, bagamat mayroon nang ganitong opsiyon ang ibang mga paaralan, hindi naman ito ready available sa maraming mag-aaral.

Aminado rin siya na ang internet connectivity at access sa teknolohiya ay nananatiling malaking ­hamon para sa maraming pamilyang Pinoy.

“In some schools it exists, but it’s not something that is ­readily available,” ayon pa kay Angara. “Alam ninyo ang state of internet infrastructure natin at siyempre ‘yung ibang magulang hindi rin kaya.”

Sa halip na mag-online classes, sinabi ni Angara na nakapokus ngayon ang DepEd sa pagpapalakas ng seguridad sa mga paaralan, sa pamamagitan ng police visibility, karagdagang security guards, metal detectors, closed-circuit television (CCTV) cameras, at iba pang safety protocols upang masigurong patuloy na ligtas na makadadalo sa klase ang mga mag-aaral.

Matatandaang maraming magulang ang nag-aalala para sa kaligtasan ng kanilang mga anak kasunod nang naganap na pamamaril sa isang paaralan sa Tacloban City na ikinasawi ng tatlong estudyante at ikinasugat ng 20 iba pa.