Gen. Acorda nag-iimpake, handa nang magretiro

MANILA, Philippines — Nakahanda na si outgoing Philippine National Police (PNP) Chief P/Gen. Benjamin Acorda Jr. sa kaniyang napipintong pagre-retiro sa serbisyo.

Ayon kay Acorda, nag-iimpake na siya ng kaniyang mga kagamitan sa tanggapan ng PNP Chief sa Camp Crame at maging sa White House, ang official residence ng nanunungkulang hepe ng pambansang pulisya.

Sa kasalukuyan, guessing game pa rin kung sino ang hahalili kay Acorda kung saan itinakda ang retirement honors at change of command ceremony para dito sa Lunes, Abril 1.

Si Pangulong Ferdinand Marcos Jr., naman ang magsisilbing panauhing pandangal at tagapagsalita sa pagreretiro sa serbisyo ni Acorda.

Una nang itinakda kahapon, Marso 27, ang extension ni Acorda bilang ika-29 PNP Chief, subalit pasado alas-5 kahapon ay binawi at itinakda ito sa Abril 1.

Habang isinusulat ang balitang ito, hindi pa tinutukoy kung sino ang papalit kay Acorda o ika-30 PNP Chief.

Base sa tradisyon, sinabi ni PNP Public Information Office Chief, P/Col. Jean Fajardo na ang mga Police Generals na may ranggong Brigadier General hanggang Lieutenant General ay kuwalipikado bilang kanilang maging Chief PNP.

Bukod sa miyembro ng Command Group at mga pinuno ng Area Police Command, kabilang sa mga matutunog na pangalan sina Director for Comptrollership, P/MGen. Rommel Francisco Marbil; Director for Operations, P/MGen. Ronald Lee. Gayundin sina CIDG Dir. P/MGen. Romeo Caramat, SAF Director P/MGen. Bernard Banac at NCRPO Director P/MGen. Jose Melencio Nartatez Jr.