Wage hike sa mga probinsiya ipatupad din!

MANILA, Philippines — Kinalampag ni Senate Minority leader Koko Pimentel na magdagdag na rin ng sahod ng mga manggagawa sa mga probinsya.

Ito ang apela ni Pimentel sa mga Regional wage boards sa buong bansa kasunod ng pag-apruba sa P40 na dagdag sa daily minimum wage sa Metro Manila.

Ayon pa sa Minority leader na kung magiging P610 na ang P570 na daily minimum wage sa National Capital Region (NCR) ay napakaliit at hindi katanggap-tanggap ang pasweldo sa mga lalawigan gayung pareho naman kailangan na kumain ng tatlong beses sa isang araw ng mga tao.

Bukod dito, nagtaas din umano ng bilihin sa mga probinsya at mas mataas pa ang presyo ng gasolina at kuryente.

Paliwanag pa ni Pimentel na hindi naman maa­aring altanghap habambuhay o sama-sama na sa isang pagkain ng almusal, tanghalian at hapunan ang pagkain ng mga nasa lalawigan araw-araw.

Dahil dito, kaya kinalampag niya ang mga regional wage boards sa buong bansa para mag-utos na rin ng umento sa mga trabahador tulad ng ginawa sa NCR bagama’t maliit din ang inaprubahan dito na P40.

Iginiit pa ni Pimentel na dapat maitaas ang minimum wage ng mga manggagawa tungo sa antas na bukod sa angkop ng kanilang trabaho at dedikasyon ay magbibigay din sa kanila ng kakayanan na mabuhay na may dignidad.

Ang pagtataas umano ng sweldo sa buong bansa ay maituturing na social justice dahil sa bilis ng inflation o pagtaas sa presyo ng mga bilihin.