Pangulong Marcos, niregaluhan si Anwar ng ‘Noli Me Tangere’

MANILA, Philippines — Niregaluhan ni Pangulong Ferdinand Marcos Jr. si Malaysian Prime Minister Anwar Ibrahim ng kopya ng classic Filipino novel na “Noli Me Tangere” ni Dr. Jose Rizal (Tercera Edition, 1909).

Ayon sa Radio Television Malacañang (RTVM) sa isang post sa Facebook na itinuturing ni Anwar si Rizal bilang “precursor to Asian renaissance” at lubos itong nagpapasalamat sa Pangulo sa pagbibigay ng isang regalong hindi matutumbasan ang halaga.

Ang asawa naman ni Anwar na si Wan Azizah Wan Ismail, ay nakatanggap ng Waling-Waling brass card holder na gawa ng mga Cebuano artisans.

Dumating si Ibrahim sa Maynila noong Miyerkules para sa dalawang araw na official visit.

Tinawag ng Pangulo na “noteworthy” ang pakikipagpulong sa Malaysian PM kung saan nagpalitan sila ng ideas at perspective sa mga bagay na mayroon silang mutual interest.  

Nauna rito sinabi ni Marcos na nagkasundo sila ni Anwar na palakasin ang seguridad, kalakalan at pagpapalitan ng pamumuhunan, at kapwa nila kinikilala ang kahalagahan ng pagpapanatili ng kapayapaan at seguridad sa rehiyon.