Pinas handa sa epekto ng Russia-Ukraine war

MANILA, Philippines — Nagpahayag ng ka­handaan ang Pilipinas sa panganib na maaaring idulot ng gulo sa Russia at Ukraine gayundin ang matinding epekto ng mga kalamidad.

Inihayag ito ni Pangulong Ferdinand Marcos Jr. sa gitna ng nararanasang pandaigdigang inflation dulot ng mataas na presyo ng pagkain, enerhiya at transportasyon.

Sa kanyang pagsasalita sa Second ASEAN Global Dialogue sa nagpapatuloy na ASEAN Summit sa Phnom Penh, Cambodia, sinabi ng Pa­ngulo na may Medium-Term Fiscal Program ang Pilipinas na nakapaloob sa Philippine Development Plan 2023-2028 na gagawin ng kanyang gobyerno sa loob ng anim na taon.

Nasimulan na aniya ang pagbangon mula sa COVID pandemic at nakakausad na ang ekonomiya mula sa epekto ng pan­demya.

Ibinida rin ng Pangu­lo na nakabuwelo ang ekonomiya mula sa 5.7 percent na gross domestic product (GDP) noong 2021 at ngayon ay 7.8 percent sa unang kalahati ng 2022 na indikasyong nakakabangon na ang Pilipinas.

Pero inamin ni Marcos na walang isang bansa ang makakamit ang economic progress kung nag-iisa ito at kailangang magtulungan upang makamit ang mas magandang sitwasyon ng ekonomiya sa Asya.