P2.92 bilyong pondo ng OVP aprub agad sa House panel

MANILA, Philippines — Sa loob lang ng 13 minuto, agad na tinapos nitong Miyerkules ng House Committee on Appropriations ang deliberasyon sa panukalang P2.92 bilyong pondo ng Office of the Vice President (OVP) para sa 2023.

Ang nasabing pondo ay tatlong beses na higit na mataas kumpara sa pondo ng OVP noong 2022 ni dating Vice President Leni Robredo na nasa P702 milyon lamang.

Sinabi ni House Minority Leader Marcelino Libanan na bagaman nais kwestiyunin ng tatlong Makabayan bloc solons ang pondo ng tanggapan ni Vice President Sara Duterte ay nagkasundo ang mga ito na gawin ang interpelasyon sa debate sa plenaryo ng Kamara.

Agad namang pinasalamatan ni Duterte ang House Committee on Appropriations sa pondo ng OVP.

“If there is anything that we can do to help you as an office in your respective mandates, in your respective legislative districts and party-lists, please do let us know. We are open to collaborations in helping our fellow Filipinos,” ayon kay Duterte.

Sa panukalang pondo ng OVP, naglaan ito ng P2.2 bilyon sa ‘good governance program kabilang ang Libreng Sakay, Pagbabago campaign, OVP food trucks, Livelihood Program tulad ng Magnegosyo Ta Day at Peace 99; Medical at Burial Assistances.

Humihirit din ang OVP ng P500-M confidential funds para sa peace and order at national security.