Pag-veto ni Duterte sa SIM card bill isinisi kay Drilon

MANILA, Philippines — Dahilan umano sa insertion o pagsisingit sa probisyon ng social media registration ni Senate Minority Leader Franklin Drilon kaya nagdesisyon si Pangulong Rodrigo Duterte na i-veto o huwag aprubahan ang Subscriber Identity Mobile (SIM) Card Registration Bill.

Ito ang mariing inihayag ni Deputy Speaker at Valenzuela City Rep. Wes Gatchalian, panguna­hing may-akda sa Kamara ng nasabing panukalang batas.

Sinabi ni Gatchalian na bagaman nais niyang maisabatas ang panukala ay sang-ayon siya kay Pa­ngulong Duterte na i-veto ito dahilan sa ‘last minute insertion’ ni Drilon.

“Unfortunately, the last-minute insertion of Sen. Drilon to include the registration of social media providers is totally not in line with the essence of this bill,” malungkot na pahayag ni Gatchalian.

“There is nothing in the bill specifying how to register such a broad environment (internet). Though equally important, that provision should have been studied further and filed as a separate bill,” giit ng solon.

Ang tinutukoy ni Gat­chalian ay ang probisyon na nag-oobliga sa mga social media networks na hingin ang tunay na pa­ngalan at phone number ng mga users na gumagawa ng kanilang account.

Ang panukala ay may mandato sa lahat ng mga public telecommunications entities na obligahin ang pagpapatala ng SIM cards bilang rekisitos sa pagbebenta at pag-activate nito. Layon ng nasabing panukala na matuldukan ang mga panloloko o pang i-scam at iba pang krimen gamit ang mga SIM cards.