PPEs ng DOH ‘di agad natanggap ng nurses

MANILA, Philippines — Kinontra ng Filipino Nurses United (FNU) ang ipinagmamalaki ng Depart­ment of Health (DOH) na agarang pamimigay umano ng ‘personal protective equipment (PPEs)’ na hindi naman umano agad natanggap ng mga nurses sa pag-uumpisa ng pan­demya sa Pilipinas.

“Nung panahon po na iprinocure nila ‘yang mga items na ‘yan, ‘yang mga PPE, ‘yan po ‘yung panahon na wala namang magamit talaga sa ospital at ang mga nag-donate ay mga private entities. Kadalasan po galing sa pri­vate donations ‘yung ginamit naming PPE,” ayon kay FNU offical Jaymmee de Guzman.

Nagtataka umano sila sa ipinapakita ngayon ng DOH na daan libong PPEs ang binili na hindi naman umano nila nagamit.

“Kahit umpisa palang po, sumisigaw na kami noon na andami pala, daang libong ‘yung sinasabi niyong binili niyo, bakit ‘di natatanggap sa ospital?” giit ni De Guzman.

Inireklamo rin ni De Guzman ang pangit na kalidad ng mga PPEs buhat sa DOH nang matanggap na nila ito ngunit sobrang limitado pa rin.

Inalmahan rin niya ang pag-angkin ng DOH sa mga ibinibigay na PPEs sa mga ospital na iginiit niya na pera ng taumbayan at hindi ng gobyerno.