P4.7 bilyong Bicol International Airport malapit ng matapos

MANILA, Philippines — Malapit nang matapos ang P4.7 bilyong Bicol International Airport (BIA) sa Daraga, Albay na inaasahang magbibigay daan sa pag-unlad ng turismo sa Bicol Region.

Kasabay nito, pinasalamatan naman ni 2ndDistrict Albay Rep. Joey Salceda sina Pa­ngulong Rodrigo Duterte at Transportation Secretary Arthur Tugade sa pagsasakatuparan ng nasabing proyekto na matagal ng pangarap ng mga Bicolano.

Si Salceda, chairman ng House Ways and Means Committee, ang nagpasimula sa proyekto mahigit isang dekada na ang nakalilipas sa Brgy. Alobo ng bayang ito na mataas na lugar at ligtas sa baha.

Inaasahang makukumpleto na ang pasilidad bago matapos ang 2021 at ang ganap na buong operasyon nito sa 2022.

Sinabi ni Salceda na ang pagbubukas ng BIA ay magsisilbing pinakamalakas na paraan para sa pagsulong ng ekonomiya ng Bicol dahil kaya nitong pangasiwaan ang 3,000 pasahero araw-araw kumpara sa 600 lamang na kapabilidad ng Legazpi Domestic Airport.

Lilikha rin ito ng 1,100 permanenteng trabaho bukod sa higit 47,000p pang ‘indirect jobs’ sa mga sektor ng kalakalan, turismo, transportasyon at iba pa sa sandaling magbalik na sa normal ang ekonomiya.